|
|
|
|
|
Edit: LHAN KRISTI SOMUDAI BANDHUM-IA Fr. Sertorio Rodrigues |
|
Oslech umedin ani mogan amchem Kristi jivit Jezu bhaxen zaunche khatir, lhan Kristi somudhai amchea sezaream modem bandhun haddunk ek nibel goroz. Ami zaite pautti mhon'ntanv ? Somudhai, somudhai, somudhai. Adim amche puvoz somudhai nastana jieunk nant ? portench somudhai nastana boro ekvott ani ekchar aslo. ghorabean, sezaream samaream modem ani vaddeant! Aiz odik korun somudhai-chi chodd goroz kiteak je amche purvoz kortalet vo eka meka sovem choltalet tem aiz amche modem bilkul nam karann atam apleponn, gory ani mijax choddlea, somaz soglloch sonvsari monacho zala, Devacho mog ani Devachi bhirant unni zalea. Hea khatir ami sezarim dha pondra ghorabeanchim ekttaim zaun, Devachem utor borobor vachun, chakun gheun, niallun ani aplea jivitak laun, veharant ghalunk xiktanv, eka meka lagim odik lagira asun mogache sobondh bandtanv ani eka meka sovem usko dakounk pavtanv. Dekhun ami somzunk favo nam lhan Kristi somudai ek Legiao Maria, vo St. Vincent de Paul Sonstha, vo ek Charismatic zomo vo ek Magnnem korpacho zomo oslo mhonn. Nam hea zomeanim amkam veil aslear vo amkam laik aslear ami bhitor sortanv. Punn lhan Kristi somudhai ek Kristi jivitachi chal (Christian Way of living), ani ti soglleam Kristi bhavarteank lagu zata, Jezuchim khorim pattlavdaram koxim jieunk. Poilea Kristanvanim oxench kelem ani jivont Jezunk govaiki dili. Dhormdutanchea Itiasachea Pustokan dusrea ani chovtea avesvoran amkam hi khobor mellta. Osli chal ani vagnnuk polleun bhavarteancho ankddo choddot ani vaddot ghelo (DI 2:40-47; 4: 32-37) Tor Saliganvchea bhavam bhoinnano! Ami Novembrachea mhoinean-san mmkam somjikai ani ollokh Lhan-kristi somudai-chi (Awareness programme) igorjent ani kopelanim, toxench Aitarachea misanim ani kheritponnim vaddeanim ghorant misam (neighbourhood Masses) somormbhleant tantun diunk vavurleanv. Heo zomati cholounk adhari vo "animators" - hankam Sat panvddeanchi poddot (7 steps Method) konn bhaxen cholounchi ti dakoilea ani oslea monan amchea kopeleanim ani igorjent (1 8ver tem 25ver Janerache) Kristi ekvotta khatir bhettoi'lea satolleant Gospel sharing komnk xikoilam. Febrerachea mhoineansun dhor pondra disanim mmchea sezareanchea zomatinim (neighbourhood meetings) hi poddot yapdun, Lhan Kristi somudai bandunk vaurtelim mhonn ravtanv. Hea zomatinim ghorabeanchea sogllea vangddeanim, hajir zaunk gorjechem. Amche dadle bhav ani tomattim bhov koran zobor xim hajir zainant. Kristanv jivitachi chal sogllea ghorabeachea vangddeanim apnaunk zai ani soglleanim mhonnge zantteanim, tornatteanim ani bhurgeanim, zomatinim vantto gheun Devachea Utracher ap-aplem jivit bodlunk sompem zatolem ani Jezucho anvddo ami ek zaunk (Jn17:21) puro korteleanv. Hem bhag amkam hea utsovachea vorsant favo zaunk, hatak hat diun amchi ~rgoz somudhainchi somudhai (community of communities) koxi bandunk nettan vavrum-ia.
|
|
HI VATT TUM EKDANCH TANKTOLOI... Orlando B Vaz |
|
"Vikram-an aplea bapaik telefon kelo. Porikxecheam disanim Vikramcho telefon ievop bapaik vichitr dislem. Toripunn uloitam-uloitam, Vikram chintest vo khontibhorit asa oxem bapaik dislem. Tanchi gozal somptoch, bapaichea monant vichar urlo. Dusrea disa aplea putak khuxal-hurbebhorit korounk apnnem kitem tori korunk zai-oxem chintun, bapain Vikramak ek kanni boroun dhaddli. Kanniechem nanv 'Pako'. Raj navachea eka ganvant ravtolea bhurgeak ek pakeachem ghor (cucoon) mell'lem. Ek dis tea 'cucoon' akek burak tannem pollelo. Tea burkantlean ek pako bhair sorunk proitn kortalo to Raj-an pollelo. Zaite proitn kelea uprant okosmat to pako thokolea porim thamblo. Tea pakeachean matui bhair sorunk zalem nam. Raj-an tea pakeak adhar diunk ievjilem. Ek kator ghetli ani to burak motto kelo. Pako soddsoddit bhair sorlo. Punn Raj kitem polletolo : Pakeachi kudd vorixtt ani tache paktte lhan, jhinlolea porim. Ken'nam tori te paktte vhodd zatole, ti kudd lhan zatoli ani to pako aple paktte viskottaun uddun vetolo - oxem Raj-an chintlem. Oxem ken'nanch ghoddlem nam. To pako apli vorixtt kudd ani lhan paktte gheun thoddeam disanim morun gelo. Ten'nam Raj-ache dolle ugtte zale. Tea pakeak tea lhan burkachi goroz asli. Bhair sorunk tannem proitn korunk zai asle -- ten'nanch tache paktte ghott ani tachi kudd lhan zatolim aslint ani eka pakeachem jivit tachean jieunk zatolem aslem. Tea ' cucoon' antlea pakea porim amchea-i jivitant amkam addkhollincher zoitivont zaunk proitn korunk poddtat. Devan amkam addkhollim mellim jivit favo kel'lem zalear ami opangull zatolim aslint. Ami nhoinch ghott-mozbut zaunchim nasleanv bogor amchean uddunk legun zaunchem naslem." Kanni sompounk hi xiddvanni asli : "Don't wish it were easier, wish you were better; don't wish for less problems, wish for more skills; don't wish for less of a challenge, wish for more wisdom." Pakeachi kanni vachun Vikramacho sobhav bodol'lo. Ani putachea kalloki Jivitant uzvadd ghalo mhonn gomtoch bapaichea xiranim kott'ti bhor rogot vaddlem. Punn vichitr mhonntat tem Vikramachi bapaik chitt. Ek onollkhi boroupeacho lekh. Tea lekhant oxem boroil'lem aslem : "Tum kitem-i korunk sodtai zalear, tum kitem-i tori vegllem korunk sodtai zalear, orthabhorit kitem-i korchem aslem zalear, tem atanch kor. Mhotvachem karonn asa mhonn nhoim, bogor kallzant than tum tem korunk sodtai mhonn, tuji axa mhonn, tujem sopon mhonn. Tuzo dor ek dis mhotvacho zaunk tujeach hatant asa, korchem asa tem sompeponnim korunk tuka bhov thodde soeg melltole. Tem korche svater, tuka pollun vechem distolem, korchem nhoi mhonn kitlixinch karonnam tujea monant ietolint. Tea vella tea pakeacho ugddas kor : burkantlean bhair sorunk proitn kelear tache paktte ghott-dhiradhik zatat. Tujea gineanachi xokti ollkhun ghe. Tujem kalliz ani ginean tuka vatt dakhoum. Kitem-i tori vegllem korunk vaur. Kitem-i novem-vegllem korunk vaurlear kitem-i vortem-mahan korcho bhorvanso upzoita 'Anything is possible.' Tum ani ekloch tum asai. Ani hi vatt tum ekloch tanktoloi. Nitt-soroll tem kor"
|
|
UXELANTLE KOLE-29 Bhudvont Kolo |
|
Poilo Kolo : O Senhor, koso assai re ? Novem voros koxem suru zalem ? Matso motto koso distai mure tum ? Dusro Kolo : Novem voros mhunnun kitem novem zalam re. Sogllem tench, adlean chalu. 'Haddli pod, khali podd.' Punn ek re ! Natalanchea disanim hanvem khavop-pivop kelam tem. ! va re va. ! Tantun mure mhoji diabetes ani cholestrol vaddlem. Borem zalem him natalam vorsak ekuch pauttim ieun, nam zalear hanv morun mhojim haddam zaupachim. Poilo Kolo : Xabas, favo tuka. Atam giroi borem, nam zalear sokallcho utthun ek tem don horam cholunk suru kor sogllem ietelem zagear. Dusro Kolo : Ek sang re, he vorsa natalancho programme boro ghelo re ? Ani kitem tuka odik borem dislem. Poilo Kolo : Programme ekdom boro ghelo. Zantte-bhurge machier ielole te polleun mhaka ani odik mhoje koliek umed aili. Bhurgim porean he pautt khoxeal karann thoinsor Youth Fete aslelean bhurgeank veg-veglleo "games" khellunk meuleo. Tech porim Food Stallant cheurisam-sorpotel upott melltalem. Punn tache poros mhaka anink-ek vost bori laglea. Dusro Kolo : Kosli re ti ? Dr. Willy-baban di'li cha tin pauttim pielai mhunnun aikolam hanvem. Poilo Kolo : Tem zalench re, Dotorarcher besanv poddum. Punn Dezembrache 30 tarker, zantteank Mis zalem tea Misak hanv mhoje zantte sasumaink gheun ghel'lom. Mis borem zalem tem zalem. Punn magir kitem re ? Tankam gorom-cha ani Buns, St. Vincent de paul-achea vangddeanim dile ani Legion Mary-chea vangddeanim sobit kantaram kelim. Ani Grande Morod hea vaddeantlea dakttea-vhoddleanim ek janot programme dilo. Itlean zaunk nam, hem sogllem polleun amchea zantteanchea xiranim rogot choddlem ani dogam zantteanim mike gheun don mande gaile. Dusro Kolo : Borem gelem tor. Xebaski soglleank ! Hanv zalear team disanim kazarank, dance-ank hanga thoim vetalom. Ani xekim novem voros bore toren suru korunk modianir Mis-ak ghelom. Punn kitem sangchem ? Poilo Kolo : Misar nidhlo kitem re ? Xi, loz bextti ani soglleanche nodre mukhar. Dusro Kolo : Toxem nhoi, akhea-i misant vantto gheunk koxench zaunk nam. Mhojem Mis pirdder ani modianicho vell pirdder zalo. Poilo Kolo : Tor koxem ? Sermanv boro lagunk nam vo Pd. Curacho choir boro lagunk nam re ? Dusro Kolo : Are fursot matsi ghe ! Sangtam sogllem ! Tea Adarsh ground-acher "Alfran Fest "zalelem tachea Band-acho avaz igorjent bhitor porian gaztalo. Communhanv gheta tednam tanchem kantar "Come to Goa, Come to Goa, Goa meri hai" sarkem igorjent Pd. Kur ani choir korta kai distalo. Itlo bailo avaz igorjent ailo mhunntokoch Mis koxe aikunk ietelem. Poilo Kolo : Hem ani kitem re "Alfran Fest" kelam tech tegui bhav hea novea vorsache president mure. He korench sarkem, nam. Ami kitem-i tori upai gheunk zai ani hea fuddem Igorjent Mis astanam oslea sogllea vostuncher bondi haddunk zai. Dusro Kolo : Tujea thonddant sakor poddum. Tujea oslea borea monanche munis ami soglle zat'le zalear aiz sorg hangach suru zaupacho. Poilo Kolo : Polle tuvem oxem mhunnlam mhonnun sangtam ; eka-mekachea uskean jieunk ami xikum- ia ani poile suater amchoch vaddo ek somudai korunk vavrum-ia. Dusro Kolo : Gomlem mhaka tum kitem sangunk sodtai to. Small Christian communities stappunk hanv jerul vavurtolom. Poilo Kolo : Borem tor mog asum-di. Dusro Kolo : Asum di, oxem nhoi, to disan-dis vaddum-di.
|