ARSO
Poilem Konknni Vebzin
Sompadpi: Bonaventura D'Pietro

• GOEMCHEA SONGITACHER KALLEM KUP
• PANCH RUPIA: Somplelea Reginald Fernandes-an boroil'li ek ruchik kotha
• MHAKA TUJI PRITI ASSA: Braz Fernandes-achi sundor kovita
• AVOICHEM RINN: Ek lahn kotha ji Moiddechea NIXKOLLONK MARIECHO PROKAS-achea poileach ankacher xapun aileli. Moiddechea firgojentlean hem masik dor mhoineank bhair sorta.

REMOCHEA PONGDDAK ABSOEG
Goenchea Songitacher kallem kup

Remo Fernandes-achea "Microwave Pappadam" pongddache lovkik songitkar--organist Selwyn Pereira, tabla vazoupi Dharmendra Hirve, gitarist Victor Alvares--ani tanchea sangata Sunil Kerkar, ani te Kanpur thavn Lucknow vetalet te Tata Sumo gaddiecho cholovpi, Setembrache 18veche ratrik, sonvsarak ontorle. Heam umedvont, huxear ani sogleanche avddicheam songitkarank, itlea poixelea ganvant, dharunn mornan giraslet. Tanchea dukhest mornan Goemchea ak'khea songit mollacher, songitkarancher, kuttumbancher ani ixttancher ek kallem chedor voddlelea porim dista.

Kanpurak songitacho proiog korun te Lucknow vetalet viman dhorunk, tedna tanche gaddiecher dusre boxin dhopko marlo ani Selwyn, Dharmendra and Victor Alvares tech ghoddiek somple. Tea absoegan Sunil and tancho drummer Santan Carvalho-k gombhir sthitir Kanpurchea Regency Hospital-an vhele. Thuim Sunil thoddea vellan ontorlo. Remo soddun tachea pongddacho ekuch sandho jivo urlo to Vasco Santan Carvalho, zo sudhecher aila punn mornantlo azun vattounk nam.

Setembrache 21ver sompleleamcheo kuddi Goeam pavleot. Tech sanje sumar sadde-chear vorancher Sunil-achi kudd Sioleche mosundder lasli. Thuim Remo ani tachi potinn Michelle, Sunilachea avoik, ani tacheam bhavam-bhoinddank bhuzvonn divunk ajir aslim. Gorib ghoranneantlo Sunil Remochea xezarakuch ravtalo.

Sunilachea inter'ra upran Mapxenchea Dattawaddi vaddeant polloit zalear, Dharmanand Hirvechea goraxim veteam soglleam rostteamcher lokh chikar bhorlolo. Khup vellan Dharmachi kudd thuim pavli and Hindu chali pollenastana ti tachea ghorant bhitor vheli. Tachea kuttumban ani soglleamnim nodor ghaltoch,  Dattavaddi mosunddecher tacho inter zalo. Pollovnozo zalem Dharmache potinink, Swetak, jika dedda-vorsacho ek put asa ani fuddlea mhoineachea sumarak ti dusrem bhurgem porsud zanvchi asa.

Dusrea disa Lotlechea Victor Alvaresa ani Ribandarchea Selwyn Pereirache inter zalet ap-aplea ganvant. Dogaimchea inter'rak chikar lokh bhorlolo, dukhanim roddttalo, chodd korun tanche sangati songitkar. Emilian da Cruz-an Victorachea inter'ra upran "Adios Amigo, Adeus my Friend", aplea sangati songitakaram borobor dhund vazoili.

Selwyn Pereira-achea inter'rak tosoch chikar lok zomlolo. Tache sangati muzg misacher vazoitale ani jednam Selwyn-an ghoddlelem ani Hindi CD-cher evpachem aslem tem git vazoilem, tednam sogleamchea dolleamnim dukham bhorlim.

PANCH RUPIA
Bor. Reginald Fernandes

Dusro ani Nimnno Bhag

[Fattlea Ankar:...Luis ieram kuliam borobor apunnui bhitor ghuslo, ani gaddientlean dhenvtea lokak kuli zai kai mhunn vicharunk laglo... (Atam fuddem vach)]

EKA mhatarean taka aplem samonn vhoron ttekxint ghalunk formailem. Hea kamank mhatarean taka 8 anne bhasaile. Luisan 2 rupia magle. Xevttim vanttponn korun-korun Luisan eka rupiacher apli zodd tharaili. Uprant taka anink ek utar sampoddlo. Tannem taka dedd rupia dilo. Hem polleun tachea jivak matxi ubh bhorli. Thoddea vellan anink ek gaddi pavpachi asli. Hea udexim sanj ieta mhunnosor apleachean 20 te 30 rupia kainch nhoi korun zoddunk zatele mhunn tannem odmas kelo. Ho odmas kortanam, aplea bapaichea avahanak atam apunn jerul tondd diunk toiar zatolom mhunn chintun to aplech bhitor khoxi zalo.

Xekim donpar zata mhunnosor Luisan zoron-moron 6 rupia komaile. Punn, itlea vella modhem lokachem samonn ukol-door korun tache hat-donke thorthorunk lagle. Pottantleo zollio-i bhukek pirngounneo ghalunk lagleo. Dekhun to eke khannavollint bhitor sorlo ani apleak ek bhai-panv magoilo. Punn, tantun apli bhuk morunk nam ti polleun tannem batat-vadda ghetle. Te khaunche-khaun voilean ek chav pielo. Punn nam, torui tachea pottacho bot'to puro zalonam. Pacho jiv tong zalolo. Apleak il'lem tori xit zai-xem taka disunk laglem. Ordhi boxi xit ghetlem. Ani tem jevlea uprant ki tcho jiv somadhan zalo. Punn, duddu farik korchea vellar to boroch khontoulo. Tachem soglem bill 4 rupia zalelem. Podrak fokot 2 rupia baki urtale. "Punn kaim nezo. Sanj zata mhunnosor mhojean anik duddu zoddunk zatele..." oxem chintun tannem novean aple zhuttiek oromb dilo.

Ratrichim 9 horam zatat mhunnosor kitleoch gaddio aileo ani geleo. Luisan zorot-motor 8 rupia komaile. Ratchea vellar anikui gaddio pois ganvant thaun pavpacheo asat mhunn to zanno aslo. Punn tachean atam anik thim ubho ravunk zainam zalem. Dekhun eke dhakttech-xe khannvollint bhitor sorun ek single chav marli, ani ek add-kuxik vochun addvo poddlo. Pun thuim lagxilean ietea-vetea lokachea avazak lagun tachea dolleank nhid ienam zali. Dekhun ratcheam sumar 11 vaztam utthun to isttixinnavelea eka bankar patoulo. Punn tea bankak bhiknnachim bhirim bhorlelim tim taka injeksanvam marit ravlim.

Hem soglem bhogtannam taka ghorcho ugddas ailo. Koso apunn khattir patoutalom ani sokallim 9 horam legun nhidun ravtalo to. Torui tannem porva kelinam. Bapaichim temam khellchea khatir to bhair sorlolo mhunnttoch, hem soglem sonsun tannem ti akhi rat thuim pasar keli. Sokallim isttixinnaruch chav-panv khaun mekllo zatoch, aple zhuttier novean ubho ravlo. Punn aplea bollsant fokot atam 6 rupia urlele polleun taka ili khont zali. Kiteak chav panv khaunk tannem 2 rupia khorchilele. To khontoulolo khoro, punn azunui taka sonvsarachi ollokh ieunk nasli.

Dha horam zatat mhunnsor tachean bhuk sonsunk zaina zali. Karann, edea vellar to ghorant tantiam na tor mas panv khaun nasto kori. Atam kal thaun hem fikem jevonn ani vhoilean to kottin vavr korun tacho jiv tong zaun gelolo. Dekhun, anink ravunk nezo zaun, khannavollint vochun te urlele duddu tannem moddchech poddle. Torui to chintalo bapain dilolo vell ieta mhunnosor apleachean 30 te 40 rupia komaunk zatelech mhunnon. Itlea mhunnosor dhakttim-dhakttim bhaddim taka tam sampoddlelim.

Donparchea sumar 12 horancher, bhailea ganvchi ek gaddi ieun Dadar ixttixinnar ubhi ravli. Luisachea bolsant sumar 9 rupia asle. Atam tannem aplem mol choddounk, vo provaxeam koddsun oglle duddu magunk ievjilem. He jin'xim konnui toren 20 rupia tori komaun te vhorun bapaik dakhounk taka zai aslem. Punn to fottoulo. Jedna tannem provaxeam kodden oglle duddu mgle, tedna sogleaninch tache sevek nakar dilo. To sarkhoch bekar urlo. He jin'xim 9 rupiantle 6 rupia jevnnank moddttoch, tachea bollsant fokot 3 rupia urle. Atam ki to matso khal-vhoir zalo. Kitem korchem tem taka somzonam zalem.

Oxem kitem chinta astannam, ek bhaili gaddi ieun thuim thambli. Tantuntlo ek provaxi bhair sorlo. Tachea pozisanvar nodor marlear to motto xett zaunk zai mhunn somzunk zatalem. Tannem aple borobor zaitem samonn haddlelem. Luisachea angan horxem anink kamak hat ghalunk takot nasli. Torui astanam to tachea fuddeant dhanvlo ani tachem samonn ttekxint ghalunk apleak fokot 15 rupia dilea puro mhunn tannem sanglem. Xett toiar zalo. Ani toair zatanam, aplem samonn chike molachem dekhun, matxe zotnaien tem vhoron ttekxint ghal mhunn xettin Luisak xittkavnni dili.

Luis, gele ratriche zagrounnem, ani tem kottin kam' korun saf thoklolo. Tache kuddiche sogle sandhe dhil zalele ani angachi foddafodd sonsunk zainasli. Torui tem zodd-chiro samonn vhorunk to toiar zalo. Bapaichim temam tor khellunk zai aslim. He 15 rupia ani anink ek-don gaddio ieit zalear aple kodden koxe-i toren 30 ektthaim zatele mhunn tachi khatri zaleli. Anik thoddea vellan tachea bapain dileli 24 horanchi mudot sompun vetali. Panch rupiam boldek apunn atam 20 te 30 rupia vhorun bapaichea paiam kodden uddoitolom mhunnon to chinti.

Poddot-morot, tem samonn vhorun Luis ttekxint dovrunk laglo. Xevttim urli ti nimanni pett. Ti sogleam poros chodd zodd asli. Ti matxi chodd zotnaien vhor mhunn xettin taka sanglem. Tantun tacheo chodd nazuk vostu asleo. Luisan pett mathear marli. Ani darvonttea bhair sortanam, ek dadhlo nettan dhanvun ieun bhitor vochunk sodhi, to rostin Luisak adoll'lo. Luis fattle vatten loklo ani matheavoili pett zomnir apttoli. Teach borobor tantunt jeo konvxecheo nazuk vostu asleo, teo futton tancho churo zalo mhunn avazantleanuch somzunk zalem.

'Thu' mhunntta mhunnsor thuimsor lok ekttovlo. To xett, zo ttekxi lagsar ubho aslo, tannem he porim apli pett zomnir poddleli polleun, ragan Luisachea angar ailo ani to zomnir poddlolo asa tachi ili-i kakut dhorinastanam, tache eke kuxir don-tin khontto xevttileo. Itlench nhoi, tunvem apleam vostunchem thoddem tori mol farik korchem poddttelem, nam tor tuka pulise tabeant kortolom mhunnon sangun tanem Luisak dhomki dili. Luisache kuddir xhello gham' suttlo.

Hea vellar, tea lokachea londdea modhlean lotton ek dadlo mukhar ailo ani Luisak lagim sorun lohu tachea kanant funklem, 'Luis, anink hanga ravonaka. Pollapoll kadd. To xett ek smuggler. Tache hanga gundda sat. Te tuka marun kabar kortele. Chol vegim. Lokachea boballantlean pasar za."

Ho avaz aikon Luisan vollun pollelem. Taka ek soponn koxem dilsem. Karann taka ti xittkavnni diupi mhunis dusro konnuch nhoi aslo, punn tacho khaxea bapui.

"Chol re. Anink ravonakai," Georgin anik ek pavtt tachea kanant funklem. Hem aikun Luisan bosttoch fattim-fuddem sorlelea porim kelem, ani lokache gorddentlean ghuson, thuimcho nattak zalo.

Te sanje dogui pai ani put ektthaim zalele tedna, bapain vicharlem, "Luis, tuka dilolo chovis horancho vell atam sompun gelo. Tor, tunvem bhasailele 5 rupia haddle-i?

Hem aikun Luis bapaichea angar xevttolo ani mhunnllem, "Mhaka guneanv bhogos pai! Hanv chukhlom. Mhaka atam duddvanchi kimot ani sonvsarachi ollokhui mell'li. Duddu zoddunk kosle koixtt ani dogdogd bhogche poddttat tevui hanvem onubhovle. Mhaka guneanv bhogos."

"Tuka hanvem bhogxilo. Tosoch hanv khoxi zalom, duddu komaunk kitle koixtt kaddche podttat te tuka koll'le mhunn," oxem mhunnon bapain Luisak ghott vengent ghetlo.

"Punn, pai, mhojea tea akantachea vellar tum thuim koso pavloi?" Luisan ojeap zaun vicharlem.

Tednam Georgin zabab dilo, "Luis, jea vellar tum ghorantlo bhair sorun geloloi, tednam hanvui tuje fattfatt gelom. Ani pois ravun sogleo tujeo chollvolleo polleleo. Kiteak, mhojea horddeant asa tem bapaichem kalliz. Jem zaite pavtti, aplea bhurgeam thaim nixtturponn dakhoita, punn tench kalliz apleam bhurgeam thaim sodanch oddtta..."

(Hi kotha somplelea Reginald Fernandes-an, zaka Konknni Romansincho Patxai mhunnon voukotat, tannem 20-25 vorsam poilim boroileli. Bhurgeamnim ani avoi-bapainim eka-mekha thaim koxem vagchem tachi khub vollokh he kothetlean dista.)

KOVITA

Mhaka Tuji Priti Assa

Braz Ferns, Siolim.

Pritichea ixtta,
Ovgunnachea kanntteanim
jivit tujem fafxinaka;
Surekh ghoddvonn tuji
murk zanvora vori mostinaka.
Niall Kor:
Oprubh nillea mollba talla
chalto ek provaxi tum;
Bhov dulob Raiacho,
Hoi, ek sondexkar tum.
Tor sang,
Oslea bhessar.....
koslo sondex diunk tum vavurtai?
Odruxttak sampoddlai?
Uloi. Dhi mhaka zab.
Polle, hanv tuzo ixtt,
Mhaka tuji priti assa,
Tujich chodd fikir assa.

Pritichea ixtta,
Xegunnanchea panvlamnim
lag vattek yatrekara;
Sonvsar amchem biradd nhoi,
Sasonn amchem Tachea ghara.
Niall kor,
Rosroxit bagi-molleant
az ek kollo tum;
Sugondit ghoddvonnincho
(ghoddiek) faleamcho ek gulab tum.
Tor sang,
Oslea bhessar....
Koslo pormoll divunk tum vavurtai?
Odruxttak sampoddlai?
Uloi. Dhi mhaka zab.
Polle...hanv tuzo ixtt,
Mhaka tuji priti assa,
Tujich chodd fikir assa.

KOTHA

AVOICHEM RIN

(Moiddechi Firgozen thavn NIXKOLLONK MARIECHO PROKAS nanvanchem ek novem prokaxonn Setembr 2000 thavn bhair sorlam. Lhan, nazuk ani vachisarkheam lekhanim bhorlelem masik hem. Glenis D'Souza baen tachi ek proti amkam dhaddleli, tacher ek lhan kotha asli ti tancheach upkaran hanga ditanv.)

BENSON, sabar vorsam Kuwait nokri kelea uprant, aplea ghora portolo. Tachi avoi mhatari zal'li ani anturnnar asli. Apnnem haddlelem bhangar, moladik boreo-boreo vostu, sundor saddi, deck ani VCR aple avoixim dovrun Bensonan mhunnllem. "Maim, heo soglleo uncha molacheo vostu hanvem tuka haddleat. Tunvem mhaka vaddoilo ani xikoilo. Heo soglleo moladik vostu, tujea koxttanchem inam."

Main mhunnlem, "Baba, kaiboreo sobit vostu, punn mhaka kiteak? Tuka teo upkarteleo."

Rat aili ani dogaim nidhunk gelim. Benson, maimxim nidhlo. Bore ratri, avoin Bensonank utthoilo. "Baba, mhaka tan laglea, pieunk ilem udhok hadd."

Bensonak nidh poddleli, torui utthlo ani udhok haddun dilem. Avoi ordem udhok pieli ani urlelem Bensonsonachea chadracher otlem. Bensonak thondd laglem, punn kainch mhunnllem nam.

Anik kaim vellan, avoin taka novean utthoilo ani mhunnllem, "Baba, mhaka tan laglea ilemxem udhok haddun divxi?" Benson, apli nidh moddli mhunn, matso tiddkelo, punn kaim zap kaddli nam, ani udhok haddun dilem.

Avoi udhok pietanam novean thoddem udhok Bensonachea chadrar poddlem ani chador volem zalem. Benson chador volem polleun kimar zalo, punn avoi zantti zalea dekhun kaim mhunnlem nam.

Anik thoddea vellan, avoin Bensonak novean utthoilo ani udhok haddunk lailem. He pavtti, Benson sarkhoch nidhen bhormetalo, apleak utthoilo mhunn boroch tiddlo, punn ogi ravun udhok haddun dilem. Avoi pieli, punn pietana hat koddkoddun udhok Bensonachea anturnnar votlem ani sarkhem volem zalem. Hem polleun, Benson ekdom' avoicher tiddlo ani taplo.

"Mhojem anturnn sogllench tunvem bhizoilem, atam hanv koso nidonv?" Bensonan tiddken mhonnllem.

Ani avoin taka mhunnllem, "Baba Benson, itleo sogott moladik vostu ani bhangar tunvem mhaka haddlam, punn mhoje pasot ek rat tujean foddunk zainam, nhoi? Tum lhan astana, sabar pavtti mhoji patt bhizoitaloi, ani tuje pasot kitleo rati hanvem foddleo nam zait?"

Bensonache dolle ugoddle. To khontin tosoch lojen bhorlo. Tannem aple avoik ghott veng marli. "Khorench, maim, tujem rinn kednanch mhojean farik korunk zaunchem nam.

Amche avoin amche khatir kelam, tem rinn amcheamnim farik korunk zaina.