"KHUXAL Novem Voros" mhunnttam-mhunnttam khuincheanuch novea vorsantlo ek mhoinno sorun ghelo. Novemch upzol'lea vorsache survatek novea vorsache nichev korop ek sundor sunvoi zaun ghelea. Zaiteanich nove nichev kelea astole. Punn he nove nichev korteleanim te promannikponnim pall'leat vo nam tem he nichev korteleankuch bori khobor astoli. Tor hea Fevrer mhoinneache survatek hea novea vorsachea nichev-a vixim nichev korteleanim thoddo bhov niall korunk zai ani tanche nichev khuim legun tim pallunk xokleant hem polleunk goroz.

Novea vorsant koslei dixent novi survat korop mhonnlear hi ek khoxechi khobor. Oslea vellar novea vorsachea somoiar mhozo ixtt Bab Joel D'Souza hannem hem tumchem-amchem Konknni Webzine jem Arso hea nanvam khall prokaxit zatalem, tachem nanv bodlun taka Janer 2001 saun Urba kelam ani tachi zobabdari, sompadpeachea rupan, mhojea supurlea buzancher dovorlea. Joel-an ho mhaka ek novea vorsacho surprise gift koso dilo. Karann mhojea monantui-ani-sopnantui naslem ki to mhaka Urba hea Konknni Webzine-acho Sompadpi nemit mhonn. Hea vixim tannem mhojer aplo visvass dovorlo dekun hanv tacho abhari.

Hea adim fokot ek vo don fautt hanvem GoaNOW Webzine-ak mhojem boroup ddadlolem. Zorui Joel mhaka niamit boroup dhad mhunn agro kori, torui hanv jivitachea rattavollinim guspun mhaka tachea magneank pallo diunk favonaslem. Vasko-chea Bondr-xarant (Port Town) saun thondd xitoll Assagao-chea nogrant sompork sadounk kottint kai diso…Assagao-cho ugdass-uch kaddlear Mapusa Khorle uprant unch khoddegant choddtti asa ti mhoje nodrekh ubi zatali. Punn atam internet ani e-mail sovloti vorvim soglleo choddtteo-dhenvtteo virgollun gheleo, Vasku ani Assagao eka-mekak tenkon ieunk xoklim. Thodde pautt mon pauta punn hat ani vell pavona osli mhoji got zatali. Atam, tor hanvem mhojem mon, hat ani vell eka-mekache somzonent ani ekvottan choltat toxem korchem poddtolem. Urba, hem konknni Webzine, Goenkar bhav-bhoinnimche ruchichem korunk dhan-mon lanvchem poddtelem hacho dubav nam. Hea mhojea vavrant, hanv sonvsarak ximpoddlelea Konknni mogiancho ani kheritponnim hem Webzine vachpeancho mog, sohokar ani pattimbo otrekhtam.

Dhonia Devan mhoji urba vaddoun Urba Webzine zonn ekleache kherit avddichem korchem ani tumchea jivitachi urba vaddounk ani choddounk Urba Konknni mogianchea kallzam-monanim ghontter korun ranvchem hech mhoje kallzantle anvdde ani soponn.

Dev Borem Korum. Mog asum dhi.

Daniel F de Souza

VALENTINE DISA NIMTAN

KAIM kallak saun monxan hache khatir apli khub xokti ani vell bhettoila. Boroinaranim, kovi-nim ani heram lekhokanim hache vixim aplea monanntle vichar ani aplea kallzantlim bhavnnam kovit, kotha ani nattkantlean spoxt kelea, kitlexench kagod vapurlam. Tor jadu liponn asa zait hea kherit prokaran, zachem nanvunch jiber ailear kallzacho dob-ddob gazunk lagta? Sonvsarik itiasachea pananim legun vachunk mellta ki hache khatir zuzam uprasleant,. zantun thoddeank zoit mevlam zalear kaim zannak harr khaunchi poddlea ani zaiteancho xevottui zala. Hache khatir sonvsarant putle (monuments) ubharleat...zorui hanv kitem sangunk sodtam tacho tuka azunui thav mellunk nam tor aik, hanv khobor korunk sodtam ti vost zaun asa tin letranchem utor "MOG".

Fevrerachea survatek sonvsar bhor lokank ek atvich khoxealkai nirmann zata, zaum to magir bhurgo vo zantto, karann hea mhoinneachi 14 tarik mhonnlear soglleank Valentine Dis-acho zorr pett'ta. Hi 14 tarik Fevrerachi kherit ponnim sonvsarantlea soglleam mogiam pasot bhettoilolo asa. Ani hakach lagun ho dis vhodd mhotvacho tosoch anonddacho zaunk pavla. Halimchea vorsanim tor Valentine Dis-ak anik ogllench mhotv ani rup dil'lem asa tem amkam disti poddta. TV, Internet ani khobre-potr madhiomanin hea Valentine Disak ek veglloch rupkar dila ani tachem mol khub vaddoilam. Mhaka dista ki hea disak jiva poros ogllem mol dilam.

Kaim favttim 14 tarik Fevrear-achi anik odikuch loukik korunk kitlexeoch kariavolli ghoddun haddttat. Godiek tumi mhaka Old Fashioned mhonntteleat, vo hanv addlench gheun boslam mhonnteleat. Punn mogall vachpeano, oslem formonn mhojer tumi diunchea adim, kaim thodde bhov gozallincher tumchem lokx ghatlear khub borem zait aslem. Hea vixioacher lagxilean ek barik nodor lailear zait godiek tumkam hanga anik vegllench kitem dison iet. Hanv ievjitam ani chintam te dixentlean tumchem-i chintop cholunk sompem zait.

Vorsantlea 365am modim, fokot ekach disa, 14ver Fevrerache, kiteak mhonn tum tujea mogiak vhoddponn diunk ievjitai ani chodd mogan-tosoch mannan lekhtai? Tea xivai tujea mogiak teach disa mollacheo vostu, bhetto ani tachea kannant kaim barik-sarik mogachim kovnam funktai? Hem sogllem vorsache 365 disui korunk zainam? Hantun kosli oddchon asa? Niz mog ani moipas dakoll korunk vorsantlo ekuch dis tharavunk zai? Zorui jivitan MOG utrak favo to man ani khoro orth kallzant-monant aslear dubhava viret zata tache poros ogllo tokos gheun ho MOG eka mogiak dispot'ttea jivitant dakholl zanvcho. Ani hem sogllem korpak tum ekuch 14 tarik fevreachi ieteli ani apunn mog kortolom munn urlele dis bestte sarchonai.

Hanv kitem mhonntam tem tor tujea lokxant ghelam zalear tem tujea chaltea jivitan vheavarant ghal ani hanv kitem sangunk soddtam tacho orth mevtolo ani hantun kitlem veglleponn upzota tem tuka apxinch thavem zatelem. Hanvem sobar pautt mhojea khas dolleamnim pollelam koxe toren mogiam zanv ghov-bhailam aplea mogiak vo vangddeak Valentine dis-ak ek vir vo raza/ranni koso korunk sonvsar artitat ani portitat, ani ekach disacho taka Raza vo Ranni korun dakoitat. Uprant to dis darer poddcheach adim sogllem visortat ani portun dusro Valentine dis ie meren sogllem asa toxem asta, kaim boreponn disun iena. Eka-mekak khorea mogache nodrent polleunk ani bhogunk visortat, zalear hanga aslolo mog varean ubhun vo nodintlean vanvhun ghelo?

Tornatteam mogiank ho Valentine Day ek atvech torechea orthan rombhlolo asta. Tanchea chintpa pormonnem hea disa tankam soglli mekhllik favo tankam zai tosem korunk, koslich fikir vo oddchon nastana. Ho dis tankam mhonnlear mouz korpacho ani ghonngonant gazoupacho. Oslea vellar hea disacho mottea promonant faido ghetat ani khub komaitat mhonntat tim mhonnlear kardam vikhttat tim, fulam-chim xopam asat tim, ani chukoinastana amche Ice cream Parlours ani Fast Food Centres, Cinema theatres, ani gift shops.

Mhojer zalear hea disacho kaim vhoddlo so porinnam poddona ani hea disan kitem tori vichitr asa oxeim mhaka disonam. Mhoje koden ghodtta titli tozvit korun dor ek dis khaxelo zanvcho oxi as bhagoitam ani ti xarti pavounk pot-tidken vavurtam. Protekh ek dis mhaka khaxelo Valentine Dis ani to khaxelo korunk mhaka mhoje potinicho khub pattimbo ani sohokar mevta ani oxi ek sondhi aslear hanv ti gheun mhozo dis mhoje potini sangata sarun tea disacho purn faiddo kaddunk xoktam. Dekhunuch dor ek dis mhaka ek Valentine Dis zal'lea porim dista. Ani hantunuch mhojea chintpa pormonne Valentine Disa-cho khoro orth ani jivitachi khaxeli khoxallkai thorloli asa.

NIALLUNK

DEVAN dil'leam gunnacho vapor korun
Jivit tujem fullanim nettoi,
Ugttea monan pot'tidken vavr korun
Jivitantle prosn-oddchonim Devak bhettoi.

****
Nagounn ekhttailoli girestkai
Di-it tuka khoxalkai sonvsarachi,
Punn ek dis ietoch khast Devachi
Ugtti zatoli nodor tujea ontoskornnachi.

****
Ostori vichitr Devachi rochnna
Kottin mellunk tichi vollokh ani khollai,
Jitli tika sonvsari nodren ollkhotai
Tache von odikh kholl tichi osmitai.

****
Mukhamoll rogtan budounk
Katorchi goroz nam tujem nak,
Kuddintlo nimnno rogtacho thembo
Varoun legit nanv tujem rakh.

Kovita

Mannkulem Goem mhojem

MANNKULEM Goem mhojem,
Xettam-bhattanim bhorlelem,
Mannkulem goem mhojem,
Nodi-vellanim nettoilelem.

Mannkulea Goenchim mhojea
Xettan-bhattam khuim zait ghelim?
Tim mati fattranim puroun kaddun
Tancher building-am ubharlim.

Mannkulem Goem mhojem
Niscomachea denneanchem daiz,
Ranna ani dongor, rukh follanim bhorlele
Khuim ghele zait te aiz?

Mannkulem Goenche dongor-rannam
Kapun tantlim zaddam-peddam,
Vinglle korun soddle, rup bodol'lem
Mas khaun urlim fokot haddam.

Mannkulem Goem mhojem,
Bhurguim-ballam uskea mhekllim nido
Atam armam ani gullio chonnea porim
Mannkulea Goeank mhojea laglo kiddo.

Mannkulem Goem mhojem,
Parchartalet mhonnun Roma Udentichem
Aichem ghanniarem rajkaronn polleun
Vittelam kalliz-mon niz Goenkaranchem.

Mannkulem Goem mhojem
Khuim bai zait tum vetai ?
Sogllench vattavronn vichitr zalam
Goenchea Saiba, tunch amkam vignantle vattai.