U r b a
TIATR 2000 vorsa pavsachea mousomant pavs komi poddla zait punn tiatracho pavs matr ozun asrona. Onbhovik digdorspeam sangata nove digdorspi machiechea porzallache vanttekar zavnk hok'kan ubhe ravlele distat. Novea kolakaranche proiog nodrek haddlear, machier bhov porzol'lo to khell-tiatr "Suseg". Sotra proig zale, zantle panch Moddgonvchea xarant, ani heram ganvamnim azun zait asat. Dekhun "Suseg" bhovsak itlo kiteak avoddlo tacher lokx ghalin oxem dislem. Her khell survatechea dekhavean thaun aplea dhobajeacho dhobdhobo soddttat punn "Suseg" khellant oxem disonam. Punn Bab Sylvester Vaz aplea nazuk survatechea gitan ani favo titlea rosall gavpan hea proiogache veovosthit dav nittaen manddtta. Agostinho-cho ho poiloch khell, ani to pollovpeanchea monan rigcho mhunnon veovosthit tozvit kel'li dista. "Suseg" khellachi kotha eka somajik vixoiacher vinnlea. Mario de Vasco, zachi potin somplea punn don mogacheo dhuvo-Roma ani Agnes-asat, tanchea jivitantlea ghoddamoddimcher attaploli asa. Mog, teag, fottingponn, itxea, durbollkai ani dudvanchi poddvi monxak ek thorar than bolteach thoracher pavoita. Kherit ronganchi fulam ekttaim korun, ek nazuk jhelo guntlelea porim he veglle-veglle prosong choturaien vapurleat. Aizkhal khoddegant som'vadacher khell-tiatr soboitat punn Agostinho chaltea utramnim aple kothent favo titli umed bhorxita ani tiatr-pollovpeank xevott meren utsukhi dovorta. Machiechi manddavol jitli bore toren sambhavlea ki tichi tust kori sarkhi asa. Bizlechi ievzonnui bharim ikmotin Bab Lesli-hannem bosoilea, ani tantlean hea khellacho rong and probhav vaddoila. Bab Sylvester Vaz apli bhumika nodrent bhorosarkhi korun uddoita. Jinsamvar kopdde to ghalta ani kopddeanchoi boro sath bhumikek favta. Bai Roma haka ami khub khellanim deklam, veglleo-veglleo bhumika kortanam. Roma apli bhumika zotnaen korta ani xebaski zoddtta. Dotor Konddo-hache bhumikent Bab Louis boroch porzollta zalear, onbhovi kollakar Bab Mario de Vasco, eka randd dadleache bhumikent bhorpur loklok votoita ani Agostinho-che kothek veovosthit tenko dita. Hoi…vixesta mhonnlear, Bab Agostinho-hannim palkar hadil'li novi kolakarn-Bai Agnes. Agnes bhes bori bhumika korun dakhoita ani aple nazuk kolechi, gavpan toxi nachpan, sakxi dita. Tachea oslea novea mukhamollachi Konknni machiek aiz khub goroz asa, dekhun Agnes machiecho porzoll and probhav fuddem vhortelem hacho vhoddloso dubhav na. Hollu-hollu, som'vadui chike soukasean uloilear borem zait aslem oxeim taka apo-ap thavem zatelem. Konknni machievele khell vinodhachea mukhel khambea bhonvtonnim ubharlele astat. To khambo konsllonk divunk zaina kiteak khellui chepnnenk poddoieta. "Suseg" khellachea vantteak osle kottin soeg iechenam, kiteak Agostinho ani Domnic ghott khand marun lokachi borik kormonuk korun, suru to xexott meren tankam hansoun naka puro kortat. Maestro Juju-hannem bharim thokos ghevn modhur songit hea khellak dilam ani tacho poddbhimb proigacher poddot asta. Bab Agostinho-haka tachea iesvont proiogachim porbim divn hi khobor tumchea kanar poddchea poilim, "Suseg" khell rupea utsov jerul monoitolo. Natalam Somoiar HALINCHEA kallar dis, suman, mhoinne itle
rosten dhanvtat ki novem voros kednam suru zata ani tem kedna sompot
ieta hachoch nem asonam. Oxe toren amkam kolltam-na-kolltam
mhonnlelea porim vorsam dhanvtat ani ho' computer iug' khorench ek
adhunik iug hem sot amkam thavem zata. Oslea vellar, don hozarvem
voros kalluch suru zal'lem kai amkam dista, punn tem sompot ailem
hachem soth amkam Natalam umrear pavlim, 'Jingle Bells', 'Silent
Night' gitam aikolim ani bazul'leam nevreancho pormoll varear
posorlo mhonntoch sidh zata. Ho lekh xaponn ieta mhonnlear protekh
eka Kristi kuttumbachea ghorant niamit Natalamchem nokhetr ani
gottho nodrekh ietlo. Ani protekh niz goenkar zanv to Hindu,
Musolman vo Kristanv 'Merry Christmas' mhunnun bhed-bhav nastonam
dor ekhtteak mogan vengoit'lo. Vhaddleleam
chedde-cheddvank Natalam mhonnlear ek mouza korpacho ani vell
anondan sarpacho soeg. Hea somoiar tankam nachank vochpak ani vell
khoxealkaen sarkpak ek bhangari sondhi, ji konnacheanuch nakarunk
zaina. Herank Natalam mhonnlear ixtta-mitrank ani soiream dhaireank
bhett korpak, vo topalantlean porbim dhaddpak ek veovosthit soeg.
Ghorant kel'lo kunsvar eka-mekak pattoun tanchea vangdda ami amcho
mog ani moipas bhettoitanv ani hi mogachi khunna amkam fuddlim
Natalam he meren bore ixttagotin sambhalltat. Sambhallchim.
Zalear hi Natalamchi
porob tuka kitem korunk apoita zait? Nove koppdde xivonk, kunsvar,
nach, mouza marop hacheruch Natalamcho orth thorla oxem tuka dista?
Nam. Hi edi vhoddli porob itleacheruch thorloli nam. Ti amkam tache
mhukar nodor ghalunk amontron korta. Hea Natalam somoiar, tum tuzo
vell moujen ani anondan sartanam kaim unne bhag'eavonth-tanchi (less
fortunates) iad kaddum-ia. Somazan ek chaltich nodor firailear
amcheach xeza-samareak kitlexech kuttumb amche nodrekh ietle je kaim
arthik karanak lagun Natalam gongonan monnounk xokonam zait. Kitlim
onath bhurgim, ji onath ghoranim asat, zankam avoi-bapai-cho
mog-moipas nam, maim vo pai mhunn ulo marpachi axea nam…tanchoi
ugddas korum-ia. Kitleam zanntteank khaxea bhurgeanim vo soireanim
fatt voilea ani tanche ut'tar piraer tankam hea ghoranim bhorti
keleant… tanchoi bhi ugddas monan haddun ho Natalamcho dis sarum-ia.
Kitle gorib kuttumb
asat zankam disachem ek legun jevonnn sarkem mellonam, xinvam-varean
kudd mannsugen dhampunk kopddeancho aspav nam tancho-i ugddas
korum-ia. Zaiteam kuttumbanim ek bori sonvoim asa ani ti mhonnlear,
Natalam disa kaim osleam unne bhag'geank aplea ghora haddun tankam
Natalam jeunan aplea sangatam jevnna mezar bosoun bhag divop. Zorui
tor tum khorench ghotteant zolmol'lea Jezuk tanche sovem polletai
zalear oxem korun tum tujea kallza-monachem mahanponn dakholl
kortai. Ani oxe toren tuka Natalam ek kherit anondachim ani khub
mhotvachim zaunk pavot. Pavchim. Hea natalamchea somoiar
'Merry Christmas' mhonnun eka-mekak tum vengoitana zorui tor tujea
kallza-monan tujea xezareacho rag krodh monan azun xizta-bazta
zalear heam tujea 'Merry Christmas'-ak orth nam. Zorui tuka Natalam
khorinch orthachim zaunk zai ani khoreli bhitorli khoxallkai tum
onbhovunk anvddettai zalear poilo tujea monnan aslolo xezarea vixim
rag krodh pois kor ani uprant taka moipasan vengoi. Zorui hea
Natalam somoiar Belea nogrant udelolea nokhetracho uzvadd tujea
kallzant fankarla zalear, to uzvadd tum dusreank diunk xoktoloi ani
tea uzvadda vixim dusreank je kallokant jietat tankam ek novi dixea
dakounk pavtoloi. Ani oslea mahan kar'iant tujem vhoddponn ani khori
Natalanchi khoxallkai thorloli asa. Aschi.
KOVITA Akrecho Vell Xokti mhoji, jiv-prann mhozo, Kitlo kall ubot? "Akrecho Vell" mhozo ghat ghetlo— Sanvsari rajvhoddkek marinaka zhompoi; *Kaim karannank lagun hea vebzin-achem nanv ARSO aslem tem URBA korchem poddlem. Novea vorsan amkam novo sompadi, DANIEL F DE SOUZA, ho Konknni vibhag chollovnk aila. Taka ut'tom iex anvddetanv anim hem vebzin vhodik probhavik zatelem mhunn bhorvanxean ravtanv. |
