|
|
|
|
|
Don Utram
Nillem mollob vhoir ani tosleach korachea udkant ufevpi Arbi somdirachim lharam hea mannkulea Goeamk aple apurbaieche vengent murditat. Xekdde bolanddle, hi sundor chunamchi nevri, maddannim nettlele rund renvche velle kuxik, xetanim revddun, Dekanachea unch hirvea porvotanche savllek sovostkaien boslea. Orixtt somdir bolandun Purtugez tika sodit aile ani sadde-chear xekdde tika chiktton ravle. Goemcho purvinlo dhorm ani riti-rivaz ghunvllavn, ostompteche dixen fuddo korun dovorle. Punn osle zage Bharatachea heraim prantanim patoll'leat. Punn hanga pavtat titleankui Goem aplea kherit probhavan bhuloita. Hea ganvcho lokh ani tancho mogall sobhav zavn asa Goemche kheritponn, zaka lagun bhailo lok hanga urponzinim lotton ieta. Hangachi veggli porompora, porbo ani sonvskruti--Kristanv toxi Hindu-bhailea lokak hispabhair manovleli dista. Goemcheo unch, sobit tor'incheo igorzo, tantle kolevent nokxen nettoilele altar, purvinlim devllam ani tantleo dev-devimcheo murteo, eke torechi dixea dakhoitat zalear nir-nirallim festam, porbo ani zatra aplo kherit gonngonn pcomottaitat. Udent ani ostomptecho zo monbhulgavpi songom' zala tacho porzollit poddbhimb utra-pavlak nodrek poddtta. Ostompti nesonn heraim xaranim zollkota punn soglleank ruchik lagta toslem jevonn-khavonn ani hunhunit ievkar Goeamtuch mellta kai dista. Dekhun vorsan-voros iatrekar hanga porot ietat and dhadosponn bhogtat. Porki sothea hanga gazli, dhorm bodol'lo punn amcheo kaim noitik chali he probhavak bodleo nant. Hem Goemkaranchem veggleponn jem bhov thoddea lokak somzota.
Xopam ani puzatam nettovn Anjuna, Kandolle ani Kolnguttche osle ganv ravleat. Punn Ameriken Afghanistanacher akromonn kelea uprant poriatonnacher odruxtt upraslam. Outubr sompun Novembr suru zalo punn azun videxi bhonvddekar hanga zollnokant. Serkar atam dexi bhonvddekarank bhulovnk lagla punn tacher amchea kinare veleam ganvamchea lokacho faido zai sarkho nam. Osle bhonvddekar khup ietat punn xaranimch gorddi kortat. Veller fokot ek bhonvddi kortat. Bom Jezuchea basilikachea adrar atam polloiat...soglle ganvtti 'turist' adrar boslele distat. Goemchea doriache kinare vhele ganv bodlot vetat.ghoram, hottelam ani dhondde usorpot nastanam kirlotat. Goemkar thuim mudansak vetalet te dis fattim poddlet. Ani atam orombacho xant-sobit Goemcho sobhavuch bodol'la. Dhurlo, dhunvor ani boball hispabhair vaddla. Sosnnikai virgovlea. Kijilam and nosai paddsar pavlea. Amchea bhurgeam-ballamcher vikhari oktancho porinnam zavnk lagla tem niallun ekdom dukh bhogta. Pordesant ravteleank disot Goemkar susegadponnim sogllem sonsun ghetat oxem. Punn na, hanga amchea dor panvlak oddchoni adolltat. Vochot thuim xello manddun nisor zalea ani serkari iontrank kolomb ievn tim bond poddlelea bhitor asat. Amche ganv sudron xaram zavietalim punn tanchem vegllemch rupantor zalam ani sogllemch kaiche-kai dista, punn serkari nodrek nhoi. Novo BJP serkar ailear atam voros zait ailem punn tanchim, sot'techer ienvche poilimchim asvaxonnam, azunui purim zavpachim urleant. Adleam disanche ubhav ietoch, te ubhav fokot porne fottu pollovn ani godd ugddas kaddun bhagonvche poddtat. Konnem tori mhunttlelem, "Hai, mhojea adlea Goa, khuim tum asai?" Oslem nirasponn vochot thuim disunk laglam ani tem nivarpache veovosthit upai azun Goemkarank zollkonant. Joel D'Souza Fulanchem-Zaiam-Zuianchem
Osnoddem (Ho lekh 1984 vors 'Novem Goem' disallear uzvaddak ailolo. Hea 17 vorsam pottim kaim adol-bodol zala dekhun, favo ti durusti korun, 'Dor Mhoineachi Rotti' masikachea sompadpean Outubrache ankan xapla). KHUB purvile itihaskar Asnoddem hem nanv koxem ailem tem sangtat: Asnodd mhollear Asa-nodd mhonnge ti nod utrunk asa Nodd vo oddchonn nodik lagun, kiteak adim pul naslo. Par mhollear bailem tonk, vo nodichi dhodda vo xevott. Hi nod zaun also Bardescho xevott, nimanno ganv, ti Par korunk tedna pul naslo. Asnoddea, nodiche dhodder ek vaddo as to mhollear Par ani hea vaddeant ek kopel asa tem Bholaikeche Saibinnik somorpilam. Hea kopelar Maiache 4ter 1872 vorsa axirvad poddlolo. Adim gormechea kallar, khub lok hangasor udok nhavunk vetalo; he nodichem udok kharem nhoi pun saiem; hem udok dongran san denvun ieta. Asnoddchea ganvant khub fulam fultat, odhik korun zaio-zuio; hea zaiam-zuiancheo pantio bazarant viktat; tea bazarant baxi ani mottoram pavtoch, kitlinch cheddvam-bailo zaiam-zuiancheo pantio vikunk ietat. Haka lagun Osnoddea pachartat mhunnon zaiam-zuiancho ganv. Mardolui zaun asa zaiam-zuiancho ganv. Asaganv zaun also fulancho ganv kiteak tea ganvant nir-nirallim fulam fultalim ani tednachim Askonvkaram him fulam ghevun vikunk Mhapxeche Pentter vhetalim. Asnoddchi Nod par kortoch, sompeponnim Xriganva (Divcholchea Talukeant) pavtat. Xriganvchem nang gazta te fanki zatrek lagun, hi zatra zata Milagr Saibinnichi (Mhapxeam) porob zatoch, zaite pavttim dusreach disa. Purvilea kallar pasun, hangasor khub suttke-zhuzari utpon'n zal'le. Hanche modhem thodde Krisitanvui aslet. Ranneanchem bondd (vo kranti) choltalem tedna, tea fanki ranamni Gill Saunt ani Morya Saunt hannim pakhleank khub nachoile; karann tea kallar thoinsor khub ranam aslim ani lipun-choriam loddhaio korunk ekdom' sompem zatalem. Tankam Cristovam nanvacho (to Pomburpecho mhonn sangtat pun hanga ravtalo) konn eklo mell'lo. Ho Kristanv lip-choriam loddhai korpant khub huxar also; karonn sogllim ranam-vonam ani tanche konxe to boro zanno also. Hea tegainim pakhleank khub nachoile. Loddhai korina tedna ho Cristovam madd kaddttalo; to zaun also ek render. Pakhleamni ek chikani toxi obghati mann'ni kaddli; te pakhle eke sundorek bhettle-ek kolvont tem. Manni'nni ti hi: zor tinnem Cristovank (Osnoddchea Kistuk) jivo vo mel'lo aplea hatant dilo tor, tika dha hozar rupoi ek bokxis koxi diunk Purtugez kobul zalet. Tea kallar dha hozar rupoi mhollear ek lakh koso. Cristovam zhuzant pakhleank kosoch sampddo naslo; te khatir ek ghatki ievjon pakleamni ievzun kaddli. Te sundoren vo kolvontan Cristovanchi ixttagot zoddli. Ek dis to nhanvunk gel'le kodden te sondoren tachim tinui armam ani gullio kaddun vhelim; uprant tinnem pakhleank khunna korun apoile. Pakhleamni Kistuk dhorlo ani tacho gollo katorlo. Uprant Morya Sauntak rukha pondak nhidlolo astam jivexim marlo ani Gill Sauntak jivit bhor kallea-panneak Mosbik dhaddlo. Oxe toren hangasorle he suttke-zhuzari ek Kristanv ani dog Hindu somple. DOR MHOINEACHI
ROTTI
|
KHERIT ani vornon korunk avgodd lagta toslem
sobit vatavronn thoddeamch ganvank favo zata. Omkeach zageank soimbh
aplea rosroxit probhavan nhannhoita and heram ganvam poros vegglea
rupkaran nettoita. Goem zaun asa oslich ek sundor scomachi oxir xir
ani Bharatache ostompteche khankek boslelem ek molladik
thik.