 |
ARSO
POILEM KONKANI VEBZIN
Editor: Bonaventure D'Pietro
|
LHAN KOTHA
Vaga Mamachem Kazar
Ek dis kazaracho somarombh (ceremony) sompoun ek zantto bhott, dongrailean cholun short cut mhonn chintun aplea ganv-ghora ietalo. Khandar marun ek pottli jinsavar vostunchi jeo vostu team kazarkaramnim taka dil'leo.
Choltam, choltam, rat zait aili. Tednam konnem taka oddkhilo. "Oh Dada, osleo domdomit vostu gheun, khoim than ailai tor?"
Patt
vollun pollelear ek vag. Torui dhir gheun bhottan mhonnllem, "Kitem
sangum baba, hanv atanch eka dadlea ani eke bailechem logn laun ailam."
Tea utrak vagan mhonnllem, "Polle, Dada, hanvui iekloch asam, mhakai ek bail polleun amcheim login laixi?"
"Bore bhaxen, tuka ek bail mure?"
"Hoi, Dada, ken'nam ieum mhoje bailek vhorunk?"
"Ieka
sumanam bhorean he re," mhonnlem bhottan, koddkoddun koxem. Hem sangun,
donunch dangam korun bhott babddo khorxet dhapet ghara ailo, ani matso
sucegad zatoch, roddun koso hi khobor bailek sangli, "Anim tannem
sanglam ieta tea sumanan apnnank ek bail zai. Nam tor mhaka dista to
mhaka khatoloch. Hanv koinchi mhonn taka bail polleum?"
Bailen mhonnllem, "Tum bextto koddkoddunaka polleum-ia, to anink khoim ieta?"
"Ani, sott korun ailo zalear?"
"Tednam hanv sangtam toxem kor..."
Khoincheanuch
ek suman pas zalem. Bhottan vag ieta to pollelo ani bailek mhonnllem,
"To anink khoim ieta mhonntali nhoi? Tor ho polle to ieta."
"Ieundi babddeak, tum sucegad rav polleum-ia, hanv tem bol'l (jar) hanga haddun dovortam, magir sangtam toxem kor."
Xekim
vag ailo ani ietanam ek merum marun haddlem ani bhitor sorun mhonnllem,
"Dadaji, hanvem tumkam ek dhakttixi saguad haddlea, hachi magir tumim
bori xakuti korun khaiat." Ani tea fuddem mhonnllem, "Dadaji mel'li mum
mhaka ek okol?"
"Hoi, hoi," mhonnllem bhottan.
"Tor atam laitai mum amchem login?"
"Hoi
tor! Hi polle mhoje bailen kaibori mall haddlea, ti tuje oklek
ghalunk!" Ti polleun vag khoxi zalo. "Punn atam tunvem poilo bhitor
vochunk zai hea bol'lant." Bol'l dakhoun.
"Bol'lant bhitor?!"
"Hoi re baba, ho poilo ek bhag lognachea somarombhacho."
"Hoi? Tor itlo vell kiteak sanglemnaim tor tuvem, Dada?"
"Tum kansad asai mhunn hanv matso ravlom."
Vag ti mall polleun murgott'talo. Tednam bhottan mhonnllem, "Chol atam tea bol'lan uddi ge."
Vagan bol'lant uddki ghena borobor, tannim gop korun bol'lachem dhampnnem dhamplem.
"Kiteak mhonn tumim hem dhamplem, Dada," vagan bhieun ani akantun vicharlem.
"Kaim na, to dusro bhag re baba, tumchea lognacho."
"Am! Anink kitlo vell hanvem bhitor ravunk zai, Dada?"
"Fokot ek te don minut, kiteak hem bol'l vhorun, hanv he-tea dorian uddoitolom."
"Hovui ek bhag amchea lognacho, Dada?"
"Hoi,
hoi," mhonnun bhottan tem bol'l mathear ghetlem ani laginch aslolea
doriant vhorun uddoilem. Uddoinam borobor gho-o-om korun ek motto avaz
zalo ani bhott thoincho nanch zalo.
To
avaz aikun lagxilea ranantli ek bukhel'li, vaginn dhanvun aili, ani
doriant kitem ufeta tem polleun, uddki ghetli kitem tori khavpachem
zatelem mhonn somzon. Tem bol'l toddik haddlem ani aplem sogllem boll
vaprun, tem dhampnnem ugoddlem. Teach borobor bhotta mamache bailen to
jhelo bollachea voir kanttak ghott ghal'lo to, somto vaginnichea
gomttean poddlo ani bol'lachem dhampnnem doriant xevttolem.
Vaginnin
polle zalear, bhitor asa vag! Taka polleun vaginnin mhonnllem, "Xebas!
Sarkoch tum amcho aiz raza (xinv) koso dislo, soglli lhonv bi fuloun!"
Him
utram aikun ani vaginichea golleant ti sobit mall polleun vagan
mhonnllem. "Tum ge sundore, mhoji sangatin zaunk fuddem sorlea ti?"
"Hoi baba, tum mhaka mandun gheta zalear, odhik korun sundore mholl'llelem aikun."
Itlean
bol'lantlo vag bhair sorlo ani ghott veng marun vaginnink beij dilo ani
vhodd suskar soddun mhonnllem, "Khorench mhaka khup tras kaddche poddle
amchea lognache sirvistte zata mhonnosor. Punn kitem zaum, Dadajin
mhaka ek bori bail sodhun dili ti khori."
Uprant
soglli khobor vagan aple oklek sangli. Koso apnnank ek Dadaji bhott
vatter mell'lo..."ani tannem babddean amchem loginn lailem. Tea pasun
ek dis ami tache upkar manunk, kiteim gheun vechim."
"Tum sangta tem borobor asa, nam tor amcho ekvott khoim zavpacho?" mhonnllem bailen.
Xekim eka disa vag ani vagin Dadache upkar attounk mhonn gelim ani vetanam bore motte don sonxe gheun gelim.
Bhottache
bailen pois thavn vag ani vagin ieta tim pollelim, asun tichea
gomtteant ek fulancho jhelo, zo tinnem sarkoch ollkholo...ani hem
tinnem ghovak sanglem.
"Oh!"
mhonnlem bhottan, "toxem zalear to morunk nam...to atam mhaka khelea
bogor kosoch ravchonam." Ani pattlea derantlean bhair sorun
pott-futtosor dhanvot ravlo.
Itlean vag ani vaginn ailim ani mhonnllem, "Mami, ami ail'lim Dadajiche upkar manunk, punn Dadaji itlo kiteak dhanvta, Mami?!"
"To baba nimanno bhag tumchea lognacho, to faleam sokallim goddiek somptolo. Te meren to dhanvot astolo."
"Bongum
babddea Dadajichem," mhonnon dogaimnim bhottache suater tache bailecho
axirvad gheun, te donui gullgullit sonxeanchi zhoddi tichea hantant
diun, ek saguad koxi, khoxealbhorit aplea thikannar portolim.
D. Bertha de Souza e Menezes
BACK TO TOP
OPARI (Proberbs)
Opar moniskulla-itli pornni zannvaien bhorleli sinsli. Zannaramnim opareo boroun kaddleo.
--Konkani Oparinchem Bhanddar (The Treasure of Konkani Proverbs), Antonio Pereira, SJ.
Dolle pavtat, punn hat pavona.
You can see it but you can't reach there.
Poixile dongor sazre, lagxile dongor hagre.
The grass is always greener on the other side.
Apli fatth apnnank disonam.
You can't see your back.
Aplem asa thoim sasonn, nam thoim mosonn.
What is ours is eternal, whatever belongs to others is a cemetery.
Apunn apnnank, Dev somestank.
Each one for himself, God for all.
Apunn khainam and dusreakui dinam.
Dog in the manger.
Dusreachea dolleantlem kisoll distam, aplea dolleantlem musoll disonam.
You see the speck in your neighbour's eye, but not the pounder in yours.
Ujeak gelear koilek patienam.
When you go to ask for embers, the neighbour gives a broken tile to carry them.
Allxi sangot tem ghaddiachea bapaichean sangum nozo.
Idle mind is a devil's workshop.
BACK TO TOP
MOTIAM...
Mixeancho Bhattkar
Bhattkaracho ugddas kaddttanam mhojea monan ek umannem udeta. Konnui
tem aikolear pott bhor hanstolo. Dusrem anim naka zal'lem chintolo. Tor
amchem umannem oxem asa:
Bhattkar bosla bolkavant,
Xevtto halta kolsavant.
Adle bhattkar volterar boson pipe
tonddant ghalun ani jornal donui hatamnim dhorun aplo vell sartale.
Zaite pavtt volterak tenkun tachem rot and paiam lagim sunnem xempddi
koullun bostalem. Hem ragixtt sobhavachem sunnem rat-dis tachi rakhonn
kortalem anim zaite pautt bhattkara porim nibor tallean bhonktalem.
Bhattkarn bhangarachea sutan bordasanv kortali anim apleam bhurgeamnim
viol vo pian vajoilelem aikon aplem horddem fuloun bhitorlea bhitor
mijeaxin murgott'ttali, ani satvea sorgar ufetali.
Bhattkarache orixtt polaxicho sambhall korpak zaitim chakram dison
ietalint. Zaite pautt tim gulam' zaun aslint, anim he porim aplem jivit
bhattkarache ghor-sevent sartalint. Tankam jivitant ankvarponn ani
nennarponn vengounchem poddtalem. Gulam' urlint dekhun tanchea
jivitacho rong polleunk tim paulinant. Fulam porim tim ful'lint ani
fulam porim tim bavlint. Khorench tanchem jivit heam utramnim amchean
guntunk zata: "Many a flower is born to bloom and waste its sweetness
in the desert air." Apleam bhurgeank vhoddlem dotorponn, advogadponn,
ani padriponn xikonk dhaddttalo. Tanchea bhattant mundkaream bhirantin
dis kaddttalint. Nennar gorjevontank juran poixeanchi mozot ditalo ani
zaite pautt tambem, rupem ani bhangar juran dovrun dubllo lok
fottoutalo.
Sanjechea vellar hatant aplem rot gheun ani pijam' ghalun bhattkar
vareak bhattant ietalo. Bhattant bhonvtannam eka gida porim aple
vhoddle dolle maddancher, zhaddancher ani durgancher firoitalo.. Ani
zori konnui mundkarean ek zhadd roilam vo koslo addos legun kela zalear
to humttun kaddpak ani moddun uddoupak domki ditalo. Ho tancho
khoddegant tallo Siole than Morje aikonk ietalo. Zaite pautt
munddkareanchim supurlim bhurgim khellachea nadar astannam bhattkar
ieta mhunn aikot zalear zollim-molim dhanvun liptalint anim nanch
zatalint. Sopnant legun ratchi bob marun tim mhunntalint, 'Lhip re,
lhip re, mixeancho bhattkar ieta, re!'
50 MOTIAM
Bor: Rev Dr Simon Rico Fernandes, Capuchin
Panam 53 (1999) Ru.20
BACK TO TOP
|
EdWords...
Arso (Konkani)...