Amchea itihasant Konknnichea mogan khupuch vati pettleat ani apunn zollon somposor Goenkarank gineanacho ani sonvsaracho uzvadd lokak dila. Konknnichim choddxim potram ani masikam vatich zalelea porim dista. Pettleli vat zoxi aplo vell somptoch palovta toxench amchea prokaxonnam vixim ghoddot ailam. Punn novim potram ani masikam uzvaddaunk Goenkar kedinch fattim soronknam. Dekun hem novem pondroxi potr tumchea hantant ami ghaltanv. Ami umedin hem rongit potr xapunk fuddem sorleanv ani hea kamant tumcho favo titlo sohokar astolo mhunnon somzotanv.

Tumkam borovpachi itxa aslear, tumchim borovpam amkam dhaddat. Kovita monan kirlolear tea kagdacher utravn amkam pattoiat. Goenkaranche ani Konknni bhaxeche soglle anvdde porgottachem sadhon ami toiar korunk evjilam. Amche bhaxechem bhanddar disandis choddunv ani vaddunv. Amkam Romi lipintlean Konknni borovpak thoddi bhov sonvoi asa ani sod’deak sompem lagta mhunnon Goencho Ulo hech lipint xapun eta. Punn Goenkar Konknni uloitat. Ulovpak lipi lagona. Khuinchei lipin boroilear vachpi Konknnich vachtele. Amkam lipicher vad naka, amkam Konknni vadd zai. Dekun tumchem borovp khuimchei lipint aslear amkam upkarta.

Hatan-hat ghalun fuddem tanch maruia ani ghoddta zalear Konknnicho vikas korunk vavruia. Mog asumdi.