NIMANNEM UTOR Bor: Miguel Braganza

NOXIBACHER BOSLAM MAZOR
Dhonia Devak dhinvastam. Tannem amkam Goenkarank 18-19 Dezembrachea mhoineant don pavtti suttka dili. 1961 vorsa Bharatan apli fovz pattovn amkam Purtugez hukumxaientli suttka dileli. 2004 vorsa Devan Goenkarank zangrut korun Bharitiya Janata Pokxeacho Iuthi (Coalition) sorkarak halovn amkam porot suttka dili. Devanuch amkam hukumxaiantle vattaile. Hem kam virodhi amdaram lagim ghoddpak ken’nanch zanvchem naslem.
Lok, ithias visortat ten’na, itihas porot ghoddta. Ho zavn asa munxakullacher ek xirap. Purtugez kallar amchea purvozank Purtugez itihas ani bhuimgoll (geography) xikovn tankam ti Goenchich mhunnon sangtale. Atam Goenchea Svadhinata Sangram he VCDint jem kitem dakhoilam tem amchoch itihas mhunnon sangonk laglet. Hi ek khorkhorit fott.
Kristanv nanvancho zativadi Komunist Komrad Floriano Diasachea ani Bai Libia Lobo Sardesai hanchim nanvam vaprun amich nivddun haddleleam amdaramnim ani sorkaran amkanch amcho itihas ullto sangon soddlo.
Hindi bhaxent mhunntat, “Hamara bil’li aur hamench meonv?”
Aminch poslelem mazor amkanch mianv korunk laglelem. Tea mazrak ami atam sakhant ghalun poltoddi soddlam. Punn mazrak nov jiv astat! Bhav-bhoinnannum, sambhallun ravat! Sott korun tem mazor tumchech chuli kuxik disot. Ganvant “mianv-mianv” korun avaz aikunk lagla.
Suttkechem mol zavn asa zagruti, sodankal zagruti (Eternal vigil is the price of freedom) oxem budhvontamnim sangon dovorlam. Tem ek sot. Ami amchi rakhonn korunk nemlele munniari-i nidhtat. Temvui khorem. Matso dollo laglo zalear sott korun mazor mezar choddon festachem jevonn-khann ibadd korun veta. Nove munniari vinchpak zai tor temvui ami korunk favo. Noveo sarni muddea poros boreo zhaddttat. Tem ami zannoch. Mazrak himsann di. Festachem jevonn nhoi. Mazrak borea jevnnachem mol kollonam tem sogllech zannot. Visor kiteak ghatlat?

HANKAM OLLKHOTAI?

Hea chitrar ek famad tiatristanchi zoddi dista. Tanchim tumi nanvam sangchim, ani D'PIETRO PUBLICATIONS, Anjuna, hannim dovorlelem inam jikchem.
Zabab hea pot'tear dhaddcho: Diamond Publications, Miriam Bldg, Rua de Natal, Fontainhas, Ponnje, Goem.
Nimnni tarik: Janer 10, 2006.
Gel’lea pavttichem inam jikpi: Sangita Naik, Kolvale.

---

JEVONN KHANN

DAL ANI TORKARECHO KALD

Zai ascheo vostu:
3 kuleram torichi dall, 1/4 kilo gazor,1kuler mokeachem pitt, 2 kuleram moido, 1/4 kilo piav, 2 kuleram tup va tel, 1/4 kilo botatte, 1/4 kilo taje pachve vottanne (green peas), 1/2 dhakttem kuler jirem, 1lhan ful kobi (cauli flower), 1/2 littor dud. Mitt ani miriam pitto ruchi pormannem.
Kald korchi rit:
Torkareche lhan kuddke korat. Dall 15 minutam bhizot ghalat. Dall ani torkari prexor kukorant 1littor udok ghalun mov zata meren ukoddat. Prexor kukor vaprina zalear 2 littor udok ghalun ukoddat. Uprant gallat. Gall'lolo kald hun korun taka dud misoll korat. Tup va tel tapoun xindlolo piyav tambso zata poriant bhazat. Taka jirem ghalat. Tup tapoun moido thoddo tambddo zata poriant bhazat. Taka kald ani piyav ghalat. Il'lexa dudant mokeachem pitt khiroun kaldak mislloyat. Borem korun challun taka mitt, miriam pitto ghalat. Zai zalear xindloli konfiri bhaji ani chiz misoll korum ieta.