Konknni cholchitrancho jadukar
FRANK FERNANDES
Goenkaranim songitan khub fank zoddloli asa ani hea khatir te sonvsarant fankarunk pavleat. Hachem xrei (credit) Goenche igorzank ani devllank favta, karonn adlea kallar teo kantar ani songitacheo balvaddeo (nurseries) zavn asleo. Hem purvichem proxikxonn gantthik bandun ani mon lavn vavr korun sonvsarache konxe te gattunk pavleant ani Hindi sinema udeog porzollunk tancho hat bhar asa. Frank Fernand hea oslea veoktintlo ek poilo voilo protinidhi zavn asa. Tannem nirmonn kelolim Amchem Noxib ani Nirmonn cholchitram tannim bosoilolea modhur songitak lagun namna zoddunk pavleant. Cheallis vorsam uprant pasun lokanche vonttar tem songit ozun khelltta, hi tachi vhoddvik. Konknni cholchitrachea sonvsarant zaitim filma ievun gelint punn hea donui filmanim ek vegllo zago rakhun dovorla.
Frankbabacho zolm Kuddchoddem ganvant Maiache 3 tarkher 1919 vorsa zalo. Bhoktivont Padri Agnelo de Souza hanche koddlean tankam Frank Fernandes nanvan bautism dilo. Songitachem mullavem xikop ganvchea mestiri Diogobab Rodrigues hanche koddlean tankam mevlem zoim to rebek, korno ani trumpet vazounk xiklo. Fuddlem xikop korpak tannem Mumboi dhanv marli ani Mumboichea Don Bosco xallent riglo. Mumboichea Greens ani Taj Mahal hottelanim vazoupak survat keli zoim unch kullieche prekxok (audience) chodd korun Parsi ani Khoja somazantle American Commercial songit aikunk posond kortale. Uprant to Mussorie pavlo ani thoim Savoy Hottelant Rudy Cotton Bandant vazounk laglo. Hanga taka jaz songitkar zavpak bhag mell'llem. 1946 vorsa to Mumboi portolo. Pandit Jawaharlal Nehrunche Discovery of India pustokan tanchi mansik vruti (mental outlook) bodol'li. Jon' Gon' Mon' hea raxttrgitachem vadheovrund (orchestration) kel'lea bodol te Nehrujincho vhodd upkari.
1948 vorsa Kongres sorkar sot'ter ietoch sorobondi lagu zali ani nachanche vosre rikame disunk lagle. Hea karonnak lagun Frank baban Hindi sinema udeogant uddi ghetli. Songitkar Roshan hanche adari koxe tannim panch vorsam kam pollelem. Raj Kapoor hanchea Barsat ani R D Burman chea eka filmanchea iesant tancho mottho hat asa hem te gorvan sangtat. Toxench Mangexkar bhoinninchea Moratthi filmanim tannem adar dila. Nimnne te Kalayanji-Anandji songitkar zoddieche poile adari mhonn vavurtale. Tanchem poilem pagar 250 Rupia aslem ani tem fokot rebek vazoupak.
Ponaxent A Salam, Ravi songitkar hanche borabor te, ek Hindi film kaddunk chinti. Punn durdoivan survatuch vankddi zali. Guru Dutt, Meena Kumari vangdda hero zanvk kosoch kobul naslo mhonnttoch hi ievzonnn fiskottli. Mogach Anvddo filmantlo LM Ratus ek Konknni film kaddunk sodi ani tea filmant Frankbab songit bosupak sanglem. Punn duddvanche oddchonnik lagun tem mukar vochunk na. Tache kanniecher adarit Amchem Noxib toiar korunk tannem hatant ghetlem.
Goenchi soddvon ani Konknnicho bhorpur mog hanche umedin Konknni filma kaddpak prerna mell'lli oxem to boddaien sangta. Amchem Noxib toiar korpak 1.25 lakh rupia khorch ailo ani Nirmonn filmank 1.80 lakh rupia khorch ailo. Nirmonn filma khatir Certificate of Merit favo zalem. Mhoji Ghorkan'n sinemank tannem aplem songit dilolem asa.
Hindi filmanim nanv zoddpak tannem, Govind Saraiya hanchea tenkean Priya film kaddunk chintlem zantunt taka 1.5 lakh rupia luskonn zalem. Uprant anik ek Ahat nanvanchem Hindi film kaddpak tannem hat ghatlo. Hem film nanvostea Inglix film Wait
Until Dark hacher adarit asa. Hea sinemancho khorch sumar 18 lakh rupia zalo. Tea filmanchea vitorokak (distributor) ottok kelolean tem bhair sorunk pavunk na.
Sinema xivai Bekar Patranv nanvancho tiatr tannem boroila ani tantunt poilech pavtt 10 vantteanchem vadheovrund (orchestra) aslem. Dr Manohar Sardesai hanchea Fulam Zai, Sobit Amchem Goem kovitank songit bosoilam zaka lagun HMV komponen taka Bombay Journal Award favo kela. Novea Konknni film kaddpeank te iesvont zatole zalear tench film Hindi bhaxent kaddchem oxi tachi budh asa kiteak Hindi bhaxent film pollovpi khub asat.
Frankbab Parkinsons piddent koxttovta. Tannem halinch 86 vorsanchi pirai huplea. Taka bori bholaiki ami anvddetanv.

Isidore Dantas
Mumbai

N Shivdasak Sahitia Akademicho Puroskar
Halinch Sahitio Akademi odeokx Gopichanda Narang hannem kolloilam te pormonnem Bharoti bhasantlea 22 borovpeam vangdda Goencho namnecho mottveo kotha borovpi N Shivdasachea Bhangarsall pustokak Akademicho puroskar favo zala. He puroskar Fevrerache 21ver Nove Dil'lik vanttpak ietele. Lekhok, activist ani xikxok N Shivdas mhonntta, Konknni ji ek lhan bhas asa jika vikasache vatter zaitech tras sonsche poddlet, tichea udexim apnnak sahit'tik mollar mhotvuch nhoi punn bhovmanui mell'lo.

GABRIELACHO GOTTO POLLOVNK GORDDI
Natalanchea disa thavn Morjechea Voilea vaddeant dor sanjek gordi zait asli. Chovis vorsanchea Gabriel D'Silvan aple hikmotin ek kherituch toren Natalancho gotto kel'lo. Bizlechi tozvit ani vell pavtoch murteanchem, eka zagear thavn dusrea zagear cholop, bore toren attaplelem. Svadik songit, devosponni gaionnam ani povitr pustokantlea son'vadancher hi sumar 20 minttanchi dakhovnn tharaileli. Dor sanjer sadde-sat zatoch tin pavtti aplea umedvont sangateanchea adharan hi dakhovnn suru kortalo. Dor pavttik tachea lahn mattvant bhorpur lok astalo tache hikmotik ani minut ghevn kelelea kamachi toknnai kortalo.

Daduchea fottvantlo sondex amkam xiddkaita
Kovi ani somajik vavurpi Dadu Mandrekar hannem halinch apnnem kaddleleam sobit fottvanchem Institute Menezes Braganza vosreant kelem. Namnecho film nirmato Gulzar hanchea hatantlean hem “Beyond Pleasure and Pain” (Sontos ani Dukha Pelean) hem prodorxon ugtem zalem.
Daduchea kemran sodun kaddleleam sobit dekhaveam modem mon'xachem rup khoinch dislem nam. Vochot thoim nisorgachi sobitai udok, zhaddam, fulam, follam, dudhsagor, adi. Sogllem ganvgirea vattharantlem, jem choddxem xarantlea lokak zollkonna. Suria udeta to ostomtosor Daducho kemra chitram dakhoit asa, ani tantlean ek ekdom' gorjecho sondex to Goenchea somazak dita. Jitlem nisorgacher mun'xachem akromonn vaddtta, titlem odik amche fuddle pillgek durdoivachem herdderponn favo zatlem. Vikas zanvcho, punn nisorgak kosloch mar lagonastana, hi Daduchi xiddkavnni Goenkarank.

SANJAY SHETYE ‘Hollywood-ak’ veta
Oxem mhonntat ki mun'xacho khoim kednach odmas korcho nhoi, karann khoincho monis khoim pavot tem konnacheanuch sangonk zaina. Oslench kitem Vaskuchea Bab Sanjay Shetye hanche sovem ghoddlem. Bab Sanjay Shetyek hanv sabar vorsank vollkhotam. Ek hanstea sobhavacho ani lhanvik utrancho moipaxi ani mogall tornatto to. Tache sovem koslench vhoddponn na. Vevsaient to ek dhondekar. Tachi 'Vinsan Travels' mhonn Vasku xarant ek 'travel agency' cholta, te xivai 'Annantashram City Shack' hi ek ruchik jevnnache jinnos mellpi khannavoll asa. Halinch kaim vorsam fattim tannim ek 'Vinsan Graphics' mhonn ek video filmam ani advertisements filmam toear korpachi ek lhan komponi suru kelea. Goeant prosud zal'leo sabar Konkani filmancheo video kesseti tannem toear keleat.
Gelea mhoineant Bab Sanjay Shetye ek niz Goenkar, ontor'raxtrik mollar khubuch porzoll'lo ani apleak ani aplea Goem rajeak nanv zoddunk pavlo. Inglez filmacho nirmotok ani digdorspi Paul Davids hanchea boreaponnan Bab Shetyek 'King Kong' Inglez filmacho 'premier show' pollovnk Dezembrache 5ver 2005, New York xarant ek khas soiro mhunn hajir zaunk amontronn mell’lem. Hem amontronn svikarun Bab Shetye Goeam thavn vimanan uddan korun New York xarant pavlo ani thoim pavun tannem 'Hollywood' hacho khorelo chomotkar aple dolle bhor onbhovlo. Oslem khaxelem bhag bhov thoddeank favo zata. Ani amcho Goenkar bhav Bab Sanjay Shetye tea disak ekuch Bharoti zaun gelo, zo hem kherit bhag, ek khas pavnno natean tea vellar ek sopon zal'le porim onbhovtalo.
New York xarant hea premier show-ak hajir astana tanchi lagxilean vollokh her sabar Hollywood Inglez filmanche vhodd digdorspi ani nirmotok, zoxe porim George Lucas, (Star Wars Digdoprspi) Digdorspi Steven Spielberg, Uma Thurman (Kill Bill) Naomi Wats King Kong filmachi notti, King Kong filmacho ani Harry Potter he sankhllicho digdorspi Peter Jackson hanche kodden zali. Thoim astana tannem Hollywood Universal studiok apli bhett keli ani tanche up-odheokx Hollace Davids hanchea vangdda bhett ghetli. (Daniel de Souza)

Delina Siena Figueiredo
Mhapxenchea S.F. Xavier Higher Secondary School-ant xikpi Aldonchem Delina Siena aplea ganvant nhoich somajik toxem sabar mollamni apli bhor ghalpi, tea xivai tem ek boreantlem 'Keyboard' vazoupi. Aplea xiramni songit misoll zalelem rogot gollta mhunn Delinan halinch sogleank dakholl kelem.
Ponnjeche Trinity College of Music of London-achea asrea khala zavpi Electronic Keyboard Grade 5 porikxent tannem hunhunit ies melloilem. Delina Sienan aplea xikxonnan sodanch huxarki dakhoilea. 2004-05 hea xikxonnik vorsa S.S.C. porikxent unch gunn gheun tem pas zatoch, tem boreantlem toxem 'all-rounder' xikpinn mhunnon, Aldonche 'St. Thomas' Girls' School,' xallent tacho bhovman kel'lo ani 5,000 rupianchem bokxis dil'lem. 'Santa Rita Opportunity Foundation, Carona, Aldona,' hannim to dobazo ghoddun haddlolo. Delina Aldonchea Carlos Figueiredo ani Santa Cruz Dhanddo vadeantlea Sita Sara D'Souza hanchi dhuv.