Khub kall dhunvorpi vadachem xekim Dezembrache 28ver agttem zalem ani haka lagun 35 vorsanchea Prithviraj Ranecho khun zalo. Ho tornatto, khonnicho dhoni adlo MGP ani atam Kongres fuddari Krishnarao Rane, hancho malgoddo put. Prithviraj aple skuttoricher sokallchea 10.30che sumarak stone crusher khonnir vetalo. Tedna lokan taka lokonddachea varanvan mar ghatlo, ani tannem jiv soddlo.
Khun korpeank dhorunk taktin jedna thoim pulis fovz pavli, tedna akhea ganvcho lok (sumar 1200 zann) ghott ekvottan ekttaim ailo, ani fatrancho xinvor pulisancher soddlo. Tantunt 30 pulis odhikari dukhovlet. North Goa SP DK Sawant, Fonddecho DySP Mohan Naik, Bicholecho DySP Waman Tari, Valpoicho PI Anthony Monserrate, Sattaricho Mamlatdar Ajeet Panchwadkar hevui zokhmi zalet. Ragachea bharant lokan pulisanchim chear vahonam foddun uddoilim.
(“Mokaso” proxnnank lagun khup kall ho Rane bhattkaram koddlean mundkar mhunnon zago mellovpacho tontto dhunvrot aslo. Xekim, Dezembrache 27ver lokan Prithvirajachem ghor fatrailem.) Xarantle porim ganvantlo lok urmott nhoi, punn ek pavtt sonsnnikai somptoch, bhirankull hinvsechea dosrak kitt lagpak vell lagona. Itlim vorsam bhirantin dis sarlea uprant, zomnni-meklle kel'leam xetkarancho rag sanvrona zalo.
Sompleleacher vaitt uloinant mhonntat, punn Prithviraj somplea uprant, to ek krur ani khotto monis aslo mhunnon lok hollu-hollu ulovnk lagla. Punn chodd ulovpeank Prithvirajachi bhirant asli. “Amchea udkant ani jevnnant pasun dhul'lo pavla. Fatrancheam khonnim udexim dhul'lo varear ubon pievpachem udok dhons zalam, xetam vibaddleant, ani osleo her tokrari lokacheo chalu asleot. Lagu zateleam khateanchea odhikareankodden tokrari korun ami thokleanv, oxem ganvcho lok mhnnta. Punn Mukhel Montri sangta apnank hea tokrarinchi kainch khobor nam mhunnon. Ho ek krur khun ani khuneank favo ti nitichi xikxa favo zateli, tannem mhunnlam.
Pulisen 120 zannank poilech dhorlele, uprant khunachea aropa khal Uttam Gaonkar, Tukaram Gaonkar, Sada Gaonkar, Rajendra Gaonkar, Raghunath Gaonkar ani Vithal Gaonkar hankaim bond keleat.
Hea khunant ani pulisancher fator marpant sorkarak ani lagu zateleam khateanchea odhikareank eke torecho dhoddo dila. Hinvsa mon'xeachea rogtant asum-ieta, punn tachem sosnnikponn ugtear ievnk bezabdari ani besarmai karann asta. Sattoricho dhoddo ghevn her osleam ganvamni ravpi ani otteachar sonspi lokui khubdovt mhunnon bhirant asli. Sattarint ghoddlam toxench Peddneam, Bichole ani Kannkonnant ani her magasleleam gottanchea loka thaim ghoddunk ietalem. Karann ragachea ujeak varo divpi komi asonant. Punn Goencho Rajpal, SC Jamir, hannem xantikai haddpachem kam' hatant ghetlam, tantuntlean somjikponnan sogllem tharear poddtelem oxem dista. Rajpalachem asvason mellona borobor sumar 200 bailo, jeo Sateri Kellbai devllant sumar 10 dis indefinite bhuk haddtalacher asleot, tannim aplo nirnnoi fattim ghetlo. Punn jitleai zannank dhorleat tankam soddi poriant apunn aplim nirdorxonnam thambhovchinant mhunntat.
Osli bhirankull goxtt tanchea jivitant kednach ghoddonk nasli. Kitlech dis Salelichea ganvantli porza kosle tori vhodd bhirantin aplea ghoranchea darank talim marun pois pollon gelea distalem. Kunkdda ani sunneam bhair thoinchea rosteancher anik kainch disonaslem. Soglleo bailo ani bhurgim Sateri-Kellbai devllachea asreant eka mekak tenkun bhuzvonn ghetalint.
Osle poilech pavtt ghoddpi ghoddnukent 'mokaso' pod'dotin Visconde ani Raneamni Purtugez sorkara koddlean lokanche vhoddle zage ani ganv pasun apnnailele tacher soglleanchi nodor gelea. Sumar xembor vorsam tannim Purtugezank sotaile. Hi kittkitt sonsunk zaina mhunnon Purtugezamni tankam xanticho bavtto dakhoilo ani ganvche kuddke tanche dekhre ani kor-vosuli korpak soddle. Punn Dipaji Rane comnidad pod'dot sarkhich kaddun uddoi mhunnon magtalo. Toxem matr Purtugezamni kelem nam. Goenche suttke uprant Sottorint, Bicholent toxech Pednneant aplea hok'kak munddkar mhunnon ube ravun nond korunk toiar zalet, punn sothe fuddem tanchem xannepon chol'lem nam. Ulott, aple khal vavurpi lokachi bhorpur apurbai ani poramos kortam mhunnon he 'khaxe' sonvsarak dakhovnk lagle. Kaim vorsam pattim thodde tornatte vechnnukek ube ravunk fudde sorlolet tankam bhirant dakhovn fattim kaddle. Punn fatrancheo khonni ani crusher mixinam tancheo kaji, xetam ani pikavoll noxtt korunk laglint, ani toxench pievpachem udok ani usvas ghevpachem varem bigddonk laglem. Tedna tankam apnnacher cheponn ghalpi forsacher virodh korunk dhaddos zalem. Gorib zalear kitem zalem? Produxonn, pidda ani piddnuk kitlo kall pasun sonsum-ieta?
Xekim xezarchea ganvchoi lok aplea hok'kak zogoddpi Salelikarank tenko divunk fuddem sorlo. Sumar 3,000 zann Valpoi xarachea rostear pursanvant aile. Putu Gaonkarachea fuddariponna khal Shetkari Kamgar Songhan nirdorxonnam kelim. Tanchim magnnim aslim: vell lainastana ganvchea lokak pulisamni fotting karannam lavn dhorleat tankam soddovnk, soglle khottle fattim ghevunk, rakhiv ranamni (reserved forests) Ran khateant cholpi soglle crusher mixinnam bond korunk, ani kitlinch vorsam ji xetki zomin te kostale, ti svotachi korun ghevn. Mokaso pod'dot kaddunk uddovnk ani Saleli prokornant vevosthit firiad korpakui tannim maglam. He durdoivi ghoddnnek ordo mhoino somplea uprant atam, Goa State Pollution Control Boardacho odeokx zago zala, ani rajeant 130 stone crushers sod'deak asat tanchi pollovnni korpak ievjilam.
Eke vatten Kongres pokxant Rane astana Saleli tontto ekdom' mharog poddtolo koso dista. Dusre vatten BJP tacho zata titlo faido kaddunk khorxeta. Xevttacho porinnam' Pratapasing Raneche 33-vorsanche rajvoddkecher kitem zatolo tacher soglleancho dollo asa. Anink ek kherit khobor Parrikar hannem Janerache 5ver sangli. Pratapsing Rane, Sot'torint mokaso zageancho dhoni, 'Abolition of Village Protection Act' 1972 vorsa Goem Songh Prodex lagu zavpacho aslo tache add aslo, oxem Parrikar sangta.
Somajik kam' korpeanim, borovpeamni ani heramni he ghoddnnecher aplo usko dakhoila. Janerache 10ver TB Cunha vosreant tanchi ek zomat zali.