Amche matiek amchi avoi mhunn man ditat. Tich amkam jivit ani bhorvanso dita. Tich amcho dev. Sateri, Kellbai, Lairaiee, Tulzai, oxim nanvam divn ami sodanch zomnicho man rakhtanv. Valltichi roinn amche avoichem rup, oxem amchea purvozamni mandlem tench ami azunui mhunnttanv.

Amchim ghoram ami matiecho kos ghevn bandtaleanv. Amchea ghorancheo vontti ami robol ani chire ghalun ghott kortaleonv. Tea adhim amche purvoz bhuienrant ani dolimni ravtalet. Zominn amche avoicho kusvo (womb) ani huntti (lap) mhunn ami mandtanv.

Min ani miner hanchea bhitor ontor asot kai? Te amche avoichea kusveacho man rakhpak asat. Ap-aplo faido korun, as bhagovn te fuddem vetat. Khonnikar chire, robol, paxanne vo lokhondd mellta tedna jelatin ani suring (dynamite) ghalun zomnichea khusveantsun mal kaddttat. Mal eke khonnicho mhunntoch to dusre khonnicher veta. Zomin tanchi avoi nhoi. Zomin tanchem negos vo dhondo.

Khup pavttim eke ostorecho mogall poti ani tachea bhurgeancho doiall bapui, dusream bailancho minn asonk zata. Ek ghor tachem kull, dusrem ghor tacho dhondo. Oxench thodde zann pradexak suttka ani ganvant gulami dovorpak vavurlele bhaxen disun ietat.

Sundor ghoram bandpi munis zaite pavttim vellechi renv lutt'tat. Veller ravpi lokanchi ani vellechi tankam doia-maia asonam. Te renv chorinant. Punn ti dusream thaim chorun ghetat. Vellecho bolatkar zata zalear ami kitem korum-ieta? To bolatkar ami kortat kai mhunnon te vinchartat. “River Princess” mhunnon amche avoichea tonddar ek kantto topla to pollovpak sogllo sonvsar ieta. Punn to bhair kaddpak konnuch fuddem iena. Dotor pasun kaim upai korpak toiar nam.

Zomin amchi avoi ani mati ticho kusvo. Amchi mati amcho dev. Tika ami mhatareanchea ghorant (old age home) dovorlea kai? Avoicho mog sorkaran pallpacho nhoi. Poilo to amich pallunk zai. Na zalear ami koslim bhurgim!