OGRLEKH
Girann Kuxin Sorlem?

Halinchea vorsamni ami polloit aileanv: pornea vorsa thavn novea vorsant panvl dovortana kosli tori bhirankull ghoddni ghoddtach. Punn 2005 vorsachea nimnnea satolleant Goeant ghoddlem tea odruxttak matr ek somajik karann aslem. Goribancho sad girestanchea ani sorkarachear kanar choddso poddona. Saleli ganvchea lokacho tor kosoch poddo naslo. Tanchi arodd, itli pois, Ponnje koxi aikonk ietoli? Tanchea “khaxeachea” hatant sot’tea ani sorkarachim sutram aslear kitem zalem?

Pinzlelean pavom ghalpi ani ghaveancher mitt marpi kednach komi asonant. Dukh, tan, bhuk ani goribi vosta thoim te rokddech pavtat. Soglle upai hatabhair pavleat, itlench tankam matr kollonk zai. Salelicho ganv koxtt ani upodreank sampoddla, tanchea jivitant xanti ani somadhan haddche bodlek Rane ani Parrikar mazra-hundracho khell khellunk lagleat tem pollovn, hem tonddak ieta. Punn porza atam utthlea ani apnnak nit mellona zalear, ani kaideant maglelem mellona zalear, her upai vapddunk toiar ravleat mhunnon Saleli tontto sidh korta.

Rajpal SC Jamirak fokot he poristhitichem gombhirponn ievzolem. Janerache 8ver to Saleli gelo. Thoincho gorib lok tachea paiam poddtalo tem pasun fottvacher dista. Kiteim zanv, xekim tannim xanneponnachem panvl marlem. Tannem tanchea ghanveancher dusream bhaxen mitt ghalunk nam, punn telacho thembo ghatlo ani molom' lailem. Thoinsorlea lokachea sukha-dukhacheo khobro bore bhaxen aikon ghetleot. Tanchi chollvoll fatti ghevnk maglem. Na tor dusvaxi monis tacho faido ghenvk xoktat tachi zanniv dili. Uprant tannim Mukhel Montreak ani heranchi bhett ghevn, ho proxnn suttavo kortana Salelichea loka thaim doiallponn dakhovnk goroz mhunn sanglem.

Salelichea lokan Rajpalachem sangnnem rokddench aikun ghetlem ani apli chollvoll fattim ghetli. Karann, to rajkornni koso tanchem modem vochunk naslo. Mukhel Montri thoim paim dovrunk ankddonk laglo. Virodhi fuddari aplo faido sodunk gelolo.

Hea ganvgirea Goenchea bhagant zal'lea ghaveachi dukh vegim sompot, punn tachi mall toxich urteli. Karann, tancho to ghavo khoroch khol aslo. Tatpurto dukhicho ilaz zala asot, punn oxem kiteak lagun ghoddlem, ani toxem porot ghoddona zanvk tosli taktichi tozvit zai, hacher favo te upai ghetlea bogor sogllem omtea kollxear udok zanvieta. Salelikaramni kel'lem bondd anik ek pautt ghunvon thoinch ievnk xeokta. Xant, xitoll Goenchea ganvanchea lokamni, ekvottacho nett ani rpbhav duddvancher ani podvecher mat korunk xokta mhunnon 2005 voros sompche adinch thavem korun dakhoilam.