FR FREDDY J DA COSTA PUROSKAR STHAPLA
Sorgest Fr Freddy J da Costachea omor ugddasak Dalgado Konknni Akademint ek puroskar sthapla, oxem Xri Wilmix Mazarello, DKA Odeokxan Janerache16, 2006 vorsa kaddlelea potrokant kollit kelam. Ho kherit puroskar jea Goenkaran Romi lipint Konknnicho vavr fuddem voronk ani Goenchi sonkruti sambhallpak sahit'tia, kola, tiatr, songit, adi xetramnim ut'tom karia kelam taka favo zatolo. Ho vorsavollicho kherit puroskar mellovpeak ek iadostok (memento) ani 1000 rupia rok favo zatelet. Poilo Fr Freddy J da Costa Puroskar voros sompttana Dezembr 2005 mhoineant divpank ietolo.
Amkam soglleank khobor asa ki Fr Freddy J da Costa Romi lipint boroilele Konknnicho okhondd pattlavdar aslo mhunnon. Zorui to Devanagri lipint Konknni xikoitalo, tannem Konknnichem poilem rongit masik “Gulab” Romi lipint suru kelem, ani thoddeach kalla uprant “Goencho Avaz” sumanachem potr uzvaddailem. Tech lovkik lipint tannem anek pustokam xaplint ani “Goencho Avaz” sumanachem potr suru kelem, oxeim DKA potrokant mhunttlam.
Tomazinho Cardozo, Prabhakar Tendulkar ani Fr Pratap Naik hanchea sangta Fr Freddyn Dalgado Konknni Akademi 1989 vorsa sthapli Devnagri borobor Romi lipik fattboll divpa khatir. Romi lipintlea sahit'tiak khuinchech vatten orthik adhar mellonam to pollovn, Fr Freddyn Dalgado Konknni Akademi punorjivont korunk soglleam borovpeank Maiache 12ver, 2004, Ponnje xarant ekttaim haddlet. Romi sahit'tiak sogllo palov divnk tannem soglleam Konknni mogiank ulo marlo. Punn Maiache 17ver, 2004 vorsa taka okosmat moronn ailem ani Konknni mogiank dukhachea konddant dovrunt to somplo. Tannem Konknni khatir kelelea teagank ani vavrak salam' korunk Fr Freddy J da Costa Puroskar sthaponn zala.

SWEDISH TORNATTIM GOENCHE BHETTER
Halinch Rotary Group Study Exchange (GSE) he sovloti khala Dokxinn Sweden thaun 4 tornatteancho ek zomo Goeam ailo.
Mathias, Caroline, Karin, Karl Otto-- nanvanchim him tornattim, aplea fuddareachea sangatan Janerachi 3 ti 7 tarikh legun Goeam aslim.
Aplea desant portotoch, Goeant astana ami on-ollkhi desant on-ollkhi loka modhem asanv mhunnon amkam kednach disunk na mhunn tim kolloitat. Tumchea lokachi fokanddi chal, mogan dilolo ievkar, jea kuttumbant ami ravtaleanv, tannim amche thaim dakhoilolo moipas, amcheam kallzamni purun urtolo mhunn tim tornattim upkari kallzan udgartat.

Adeus Bai Kiran Dhingra
Goenchi Mukhel Sochiv, Xmt Kiran Dhingra hichea boldi zalea ani Goeantli zutti soddun ti atam Dil'lik veteli. Tichea zagear sod'deak Xri JK Dadoo kam polloitolo. Goenchea rajki ghirgireant chodd kall konnuch tigon uronam. Dhingra porumchea Fevreran Goeant aileli ani ek voros sompchea adim tinnem aplem bhixannem ukolchem poddlem. Montreanchea mona pormonnem jea rajeant sogllem thorlelem asa thuim xist pallpi odhikareanchem xanneponn cholchemnam mhunntat tem khorem dista.

Ekxem-don Vorsanchea Jivitachem Noxib
Janerache 7 tarker, Sottorichea poixilea Kumar Khand ganvant Vithu N Kharwat nanvacho zantto ontorlo. Horxim aiz-na-faleam konn tori Devachea ghorant vetach, punn Vithu bab matso vegllo. Tannem Goenche suttkechea zhuzan pott-tiddken bhag ghetlolo. Te bhair, sompla tedna tachi pirai 102 vorsam asli. Aiz-kal itlim goddamoddit vorsam bollanddunk bhag mellta? Tache fattlean tachea kuttumbant urleant tachi potin, Bhagirati, ani nov bhurgim.

TINLLEAM BHURGEANCHO ZOLM
Sabar ghorabeamni zonvllim bhurgim zolmoleant tim ami zannonv. Punn Sankllechea Virdi ganvant ravpi Nisha Naik he bailen ekech khepek tinlleam (tigam) bhurgeank zolm dilo. Hantunt asat don cheddvam ani ek cheddo. Hi vegllich ballvontponnachi goxtt Goem Voizuki Kolejichea hospitolant Janerache 7ver ghoddli. Nisha delivered two daughters and a son after a caesarean. Dr Guruprasad Pednekar ani Dr Ajit Nagarsekar hannim Nishachem caesarean korchem poddlem. Avoi ani tigaim bhurgim bolaikent borim asat.

THE PARISH CHURCHES OF GOA
Jose Lourensachem soglleank dipkavpi novem pustok
Goencheam 158 igorzanchi ekttail'li gorjechi mahiti hea poilim vachunk mellonasli. Tiche borobor igorzanche sobit fottu ghalun Jose Lourenco hannem “The Parish Churches of Goa” pustok toiar kelam. Hea pustokachi ugttavnni Arsebisp Filip Neri Ferrao hachea hatantlean Bispache polasint Janerache 11ver zali. Hea lhanxea dhobajeak Up-Mukhel Montri ani Poriatonn Khateacho Montri Dr Wilfred de Souza, ani sabar namneche munis hajir aslet.
“Amkam obhiman mellpa sarkheo Goeant zaiteo vostu asat ani Jose Jourenco hachem pustok tancho obhiman anikui vaddoitelem,” oxem Arsebisp Saiban mhunnllem. Hea kherit pustokant igorzanchea fuddlea bhagache fottu, bandpachi bariksann, porbeche dis ani her mahiti asa, ti soglli toiar korunk apnnank chear vorsam laglint, oxem Jose Lourenco sangta. “…Dhormik ghoram udexim jem amchem purvinlem daiz asa, tachi zanniv divnk ani tancho sambhall korpachi zababdari amcher asa mhunnon soglleank pottovn divpacho hea pustokacho mukhel hetu.”
Pantaleao Fernandesan soglle fottu kaddleat. “Hea kamachea nimitan ami zaite ganv bhonvleanv ani Goenchea vegllea-vegllea vattarantlea lokak bhettpachi amkam sondhi mell'li,” oxem tannem fuddem mhunnllem. Hea pustokachem lhanxem vimochan kortana Prajal Sakhardanden sanglem ki igorzancho fuddo durust korpachea niban sogllem 'architectural' daiz bodlon vochona zavnk ami upai ghevnk zai.
Hem pustok Goenkarank, chodd korun videxant, pavonk zai, oxem Dr Willyn aplea ulovpan mhunnllem ani haka lagon apnnem tem xhap'pak orthik pallov dila mhunnon gomoilem.
“The Parish Churches of Goa” pustokak sogllim mellovn 220 panam asat ani tachem mol 495 rupia.

DORIA PONDAK BHONVDDI
Vasku Baina vellek ek novem rup divpachem kario, Murgonvcho MLA , Elvis Gomes, hancho sohokar gheun kam' korunk nettan muukhar sorla. Janerache 8ver hanga doria kinarer eke atvech torechi sovlot toear korun tichem udgatton kelem. Hi sovlot mhonnlear zankam konnak doriant mouza korunk ani khellun vell sarunk umed asa, tannim he sovloticho purai faido gheunk zata. 'Adventure Water Sports' halinchea kallar Goeant sthanik lokam ani bhovddekaram modim khubuch lovkik zala. Tor oslea khellachi sovlot Baina veller toear kelea.
H2O hi ek Mumboi xarantli komponi he veller torekvar sovloti sthanik nagrikank toxench Goent ievpi bhonvddekarank diunk fuddem sorlea. Sod'deak tannim hanga kaim 'Jetski, Para Sailing, Speed Motor Boats, Kayaks,Bump Ride' ani her vostu haddleat. Te xivai tanchi ek vixex gozal mhonnlear 'Sea Walk'. Hem 'sea walk' kortolean aplea paiancher doriachea thavak cholunk zata. Hem cholop korpak tuka doriant penvpak gomonk zai, osli kaim goroz na. Konnacheanui hem 'sea walk' surokxitponnim korunk zata.
Oslem poilech khepek Goeant ieta ani tem Baina veller onbhovunk mellta, oxi mahiti amkam H2O-cho Odeokx Rajiv Somani hannim dili. Baina velle samkar laginch doriant aslolem 'Pakeanchem Zunvem' vo 'Bats Island' mhunnttat thoinsor hem 'Sea Walk' korunk vevostha kelea.
Murganvcho amdar Karl Vaz sangta; 'hanv nagrikank sodanch kitem borem ani dorjedar diunk
otrekhtam. Hech nodren hi sovlot hanga hanvem haddlea. Mhaka zai Baina doria vell ak'khea Goeant lovkik zal'li Hea kamant mhaka Murganv Nogorpalikecho Mukhel Odhikari Elvis Gomes, hanche koddlean khub pattimbo mell'la ani hem kam' sogllem 15 disam modim ami tharear ghalam. Hantunt tacho khub aspav asa.'
Elvis Gomes, zo Nogorpalikecho Mukhel Odhikari asa, tannem mahiti ditana sanglem, 'Amkam hea dokhinn Goenchea vattharant bonvddekaram khatir dhorjedar sovloti nirmann korpak zai. 'Star Cruise Liners' atam ievnk survat zaleat mhonntoch, Murganv bondrantlean khub unch ani dorjedar bhonvddekar dor sumanak Goeant bhett kortat. Tankam ami kitem tori moladik diunk goroz, zoxe porim tancho vell ani despez kortat team duddvanchem foll mellunk. Mhaka khatri asa Baina veller hi sovlot nirmann kel'leant Vasku xarak ani Baina doria vellek ek novem rup ietolem ani hanga bhonvdekarank toxench sthanik lokank khub dadhosponn melltolem. (Daniel F. de Souza)

INDONEZIACHEO KAZUCEHO BIO PAVLEOT
Goeant atam thonddeche dis suru zaleat ani Goenchea aframentamni ani dongracher kaji ful'leleo distat. Kazkaranchea jivak khub sontos bhogla ani borem pik soglle anvddetat. Tech borobor Murgonvchea bondrant Indoneziak thavn kazucheo bhazunk nasleleo bio ghevn bott ailea. Hem poilech pavtt ghoddtta karan hea poilim videxantleo bio aiat korunk porvangi nasli, ani gorozui nasli. Atam Valpoiche Ajanta Industries ani Sunrise Industries komponeanim heo bhio haddleat. Goencheo bio hea karkandeanchea kanan ghalunk legun pavonant ani bianchi tutt zavn te bond poddpache doxer pavlele. Bio pod'dotxir toiar korun vikhrek ailea sumar 75 vorsam zalint. Sod'deak Goeank 35 bianche karkhande chalu asat ani sumar 5,000 kheddeantlea dadleank ani bailank rozgar ditat. 1980 voros lagosor 60 tok'ke Goencheo horveo bio Goenche bhair vikhrek vetaleot, karann tednam teo process korunk goroz titli ti veovostha nasli. Ti vevostha atam vaddlea punn kaji komi zaleat.