Daijiworld News Network' hannim internettar batmi dilea tea pormonnem, eta tea Jun mhoineant thavn Mungllurchea Katolik xallamni Kan'nad lipint Konknni bhas xikovpachi xok'keata asa hem sid'dh zata. Eric Ozario, Karnattaka Konknni Akademi-cho Od'dheokx, Konknni bhaxek Devnagiri lipi vangdda Goeant Romi lipik, Mungllurant Kan'nadd lipik ani Keralant Malayalam lipik ekuch sthan aschem mhunn zhuz manddpi ek promannik Konknni fuddari, hachea fuddariponna khal ek xist-monddol Mungllurche Bism saib, Aloysius Paul D'Souza, hanchi bhett ghetli ani Konknni bhas, Kan'nadd lipint xallamni xikovpachem mhotv pottovn dilem. Sorkar odhikrut porvangi dina zalear poriant Karnattaka Konknni Akademi xikxokancho pagar ani dusro khorch apleacher ghevpak kobul asa mhunn utor dilem.
Goenkaramni ek zanna zavpak zai ki Goeant zoxe 5 tok'ke Devnagiri lipi pattlavddar asat toxech 5 tok'ke Devnagiri lipiche pattlavddar Karnattakant-ui asat. Zoxe porim Goeant hea 5 tok'ke Devnagiri lipichea pattllavddaramni 'manipulations' korun Goemchea Katolk xallamni Konknni Devnagiri lipint bhurgeancher thapli tech porim hech lok Karnattakantui Devnagiri lipi ani tich boli thapunk proitn korunk laglet. Romi lipi mogianchea bholeaponnank lagon, Goeant he 5 tok'ke lok iexesvit zalet punn Karnattakant tankam iex mellpachi xok'keata na kiteak thoimsorlo Bism saib ani Katolk porjek Konknni bhas Kan'nad lipint zai.
Ami zanna zavpak zai ki Goeant zoxe porim amchea igorjamnim soglleo dhormik kariavolli Konknni Romi lipient choltat toxeoch Mungllurant soglleo dhormik kariavolli Konknni Kan'nad lipient choltat. Romi lipiek itlo khol ithias ason porian Goenkaramni teag kelo punn Mungllurkar teag korunk sodhinant, aplo hok rakhunk vavurtat.
Bism saib Aloysius Paul D'Souza-n Eric Ozario ani heram lagim bhasabhas kortana oxem mhunttlem, “Konknni bhas hi amchi avoi bhas ani amche Diosezint 4 lak lok Konknni uloita ani boroita. Amcheo soglleo dhormik kariavolli Konknni bhaxen zata. Tea khatir hanv khub khoxi zatam kiteak rokddich amchea iskolamnim Konknni xikxonn zatolem mhunn. Hea bhes borea kariak hanv mhojo sogllo tenko ditam.”
Padr Wilson D'Souza, 'Catholic Board' hacho chittnis hannenuim hea borea vavrak sogllo adhar bhasaila.
Oxem ghoddlem zalear Mungllurant lokanche avddichi lipi Kan'nad ani tanchech avddichi boli xikxonnant vapurtelet. Hea karannank lagon Mungllurant Konknni bhas mogan xikhpachi goddi lokank lagpachi xok'keata asa. Goeant hem urfattem zal'lea karannan lok Konknni bhas soddun Inglez xikhxonna fattlean dhanvta tem ami polletanv.
Anik ek dukhachi khobor mhunttlear Goencho sorkar 'Goa Education Act' hantun sudharna korun Inglez bhaxen novim 'Primary Schools' sthapon korpak sovloti divpacho asa mhunn kollon ailam. Oxem zalem zalear anik Inglez bhaxen mullaveo xalla sthapon zateleot ani Konknnintleam xallancher marekar dis ievunk xoktat. Oxem zalem zalear Mungllurant Konknni bhaxen xikhxonn fulpachi ani Goeant Konknni xikxonn bavpachi xok'keata asa, oxem tuka disona?

ROMIKUI EKSARKHEM STHAN DIAT: DKA

Dalgado Konknni Konknni Akademichi general body sobha Ponjechea TB Cunha vosreant Marsache 12ver bhorli. DKAchi aiz pasun kelelea kamacher niall korunk he boskechem mukhell karann aslem. DKAn Romintleam Konknni boovpeak sol'lo, sohokar ani protsahan divpachi mhoim' ji suru zalea, tacher odeokx Wilson Mazarello hannem barikh mahiti dili. DKAchem boll vaddovpak koslim panvlam marunk zai tacher veg-veglleam vangddeanim suchonam dilim. Punn soglleamche ekuch mot aslem: Devanagri sangatak Romi lipikui eksarkhem sthan mellovnk ghevpak DKAchem mukhel karia asa. Ho sondex dor eka ganvant pavovpachi goroz asa ani tivui suru zalea, oxem Mazarellon gomoilem. Soglleam Goemcheam amdarank bhettovn Official Language Act 1987 kaidheant durusti korun romi lipik tantunt aspavpachem kam tannim fuddem vhoronam zalear, Konknni porza aplo pattimbo chintun tharaitele hemvui tanchem nodrek haddlam, oxeim tannem fuddem sanglem. Vhodde sonkhen Goemkar Romi lipi vapurtat dekhun ti favo to man ani mohotv prapt korun ghevnk DKA thambonastana vavurteli mhunnon soglleancho nichev asa.