AMCHO LOK
Dr Jose Pereirak Mahle Puroskar
Bor: Joel D'Souza
Itlim vorsam sonvsarik mollar puroskar ani man zoddun ailelea Dr Jose Pereirak 2005 vorsacho Dr Kashinath Mahale puroskar Asmitai Pratishthana koddlean favo zata. Kuddtore ganvcho Dr Jose Pereira Amerikeche Fordham Vixvidialoient dhormxastr (theology) xikoitalo. Bospagari zalea uprant tannem Amerikentuch ravnnem kelam, punn vorsak ek pavtt tori ganvghora Kuddtore bhett divunk to chukoina. Tannem aplea jivitant jitlem boroilam, vachlam, xikoilam, chitrailam ani pollelam, titlem halimchea vorsamni bhov thoddeam Goemkaramni kelam. Jivitbhor borem kam' keleleachi thoknnai korun Asmitai Pratishttan taka ho puroskar bhettoita. Ho suvallo Maiache 27ver Moddgovant zatolo. Unch dorjeachea sodlavpi, borovpi ani sahitiakarank ho man favo zata. Hea puroskaran 10,000 rupiachem bolos, bhovmanachi utravoll ani ek iadostik aspavta. "Konkani Mandakini" Dr Pereiracho sodlavpi pustok asa tantun 12vea xetkant thavn Konknni bhas koxi boroit aileat tache nomune tannem tokos ghevn ekttaileat ani amchi bhas koxi bodlot ailea tacher uzvadd ghatla. “Bhokti Gitam” hem tachem devosponni gitamcher adharlelem pustok. Hea Konknni mullavem songit ani git hacher sodlavpean anink ek mohotvachem pustok boroilam tem asa “Songs of Goa”, don-pustokanchea sangddan Goemchim gitam. Goemche dekhnni nachacherui tachea pustokant bhorpur uzvadd ghatla ani Konknni sahitia ani sorospot girest kelea. Tea bhair, Dr Pereiran dhormxastr (theology) ani vastuxilpxastr (architecture) vixoiancher bhorpur borop kelam ani ontoraxttrik porisonvadhani (seminar) vachlam.
KOKOYK PRI FREDDY PUROSKAR
Soglleam Goemkaramnim ekttaim ievn Konknni bhaxeche progotichea vavrak khand marunk goroz asa, oxem Zito Almeida hannem Abrilache 10ver Moddgovant zalelea Dalgado Konkanni Akademichea (DKA) suvallea vellar sanglem. Oxem kortanam lipi vixim ontor dakhovnk favo nam, oxeim tannem “Fr Freddy Puroskar 2005” John Gomes Kokoy bhettovpeachea suvalleachea mukhel soireachea natean uloitanam mhunntlem. Romi lipi Goemkaramchea kallzant poilea zagear ravta dekhun torne pillgen tacher vodhik mon lavnk zai, oxeim tannem mhunntlem. Sorgest Pri Freddy ek boreantlo boro borovpi aslo ani Konknnichea vavrak tannem molladdik vavr kelolo, oxem adlo Sobhapoti, lekhok ani tiatrist Tomazinho Cardozo hannem oxem udgar kadllet. John Gomes Kokoyn Konknniche udorgotichea vavrant mohotvachi bhor ghatlelea dekhun taka hea puroskarcho man prapt zalo. Romi lipli ontor'raxttrik dekhun tika Goeant favo to man divpachi goroz asa, ani soglleam tornatteamni ticher lokx divpachi goroz asa, oxem Kokoy baban mhunttlem. John Salvador Hipolito Roquelino ganvat Kunkollecho. Mumboi toxemch Goeant taka ek namnecho batmidar, lekhok, sutrsocholon korpi ani gavpi mhunno sogllem vollkotat. Aplea folladik jivitachim satt vorsam tori tannem Konknnichea xetrant bhov umedin kam kelem, tantun asun kitlech tiatr, kesettam ani her prokar. Sumar 500 tiatramnim tannem kam kelam ani 3000 tori kantaram ghoddleat ani aplea movall avazan gaileant. Konknni tiatristamnim Konknni somazant zaitem moladik kam kelam dekhun tankam khub xebaski favo, punn zaite zann tankam kikont kortat mhunn DKA Odeokx Wilson Mazarellon, aplea survatachea ulovpan, xinn kelem.
Hansovpi Alexyz-achem kam'
Bradman Songroloint
Bor: Roque Fernandes
Komik chitram kaddun somazantleam chukincher boddi marun vachpeank hansovpi Alexyz khellacho vhodd mogi. Kolejint astannam to futtbol khelltalo. Khontt marun eka virodi khelgoddean tachem domporuch moddun uddoilem. Moidanavelo to tea disa bhair usoll'llo punn khellachi avodd to azun aple kolevont chitranim porgottaita. Taka kriketti chodd avoddta ani tantuntleam modhem ontor'raxttrik namnecho Don Bradman zalear tachi chodd avddicho.
Alexyzan aplea “Howzaat” cartoon pustokant Don Bradmanachea chitrak poilea panacher man dila. Tosench tannem Bradmanachem “Sportrait” chitr kaddun Don Bradman Museum, New South Wales, Australia, pattoilelem, tem atam thuim manachear zagear dovorlam. Halinch te songroloiache Peggy McDonald hinnem amchea hansovpeak ek porbeamchi chitt borovn mhunntlam, “Borovpan tosoch chitr kolen tum ekdom huxar. Him donui denim ekttaim asop mhunnchem ek oprub. Sir Donald ontorlear ek voros bhorta tea somoiar hanv tuka hi chitt boroitam. Sonvsarachea sabar ganvantlean amkam karddam, chitram, chitti ani kovita aileat, punn fokot Goeam thavn tuvem pattoilele bhettent donui prokar ekttaim asat kala ani kovita.” Alexyz sangta ki koslea tori iogaiogan Bradman Fevr 25, 2001, somplolo tache adlea disa tannem hea mahan kriketterachi chitr purn kelelem mhunn. Soglleam vhoddam munxeanche volerint Alexyz Bradmanank manachem sthan dita. Bradmanacher tannem sabar chitram kaddleant tanchem ek prodorxonn korunkui Alexyz ievjita.
ROMI KONKNNIK NOVI ANKRI

NAL'LACHI LAGVODD
Kottombi - Kepem ganvchea Nevil Alphonsan maddachea logvoddicher ek mohotvachem pustok Maiache 29ver uzvaddak hadlem. Goa Konkani Academycho odheox Pundalik Nayak ani her manest hea suvalleak hajir asle.

JANYA-CELI
Bonaventure D’Pietrochi novi kadambori Janya-Celi Goenchea 19vea Ghottokraj Disa mahiti ani prosidh’dhi khateacho sonchalok Menin Peres-ache uposthitint GKA odeokx Pundalik Nayak-acheahattant uzvaddak haddli.

Hea voilea donui pustokank Goa Konkani Akademicho orthik pallov mell’la.
HANKAM OLLKHOTAI?

Hea chitrantleam kolakaranchim tumi nanva sangchim, ani ho dekhavo khuimchea tiatranlo to sangun, D'PIETRO PUBLICATIONS, Anjuna, hannim dovorlelem inam’ jikchem.
Zabab hea pot'tear dhaddcho: Diamond Publications, Miriam Bldg, Rua de Natal, Fontainhas, Ponnje, Goem.
Nimnni tarik: Jun 15, 2006.