PUSTOKAM
PRI MENDESACHEO KOVITA
 Pilar
sonsthecho Pri Frank Mendes jivitacheam vivid dixttaveank sor
zata tosleo ekdom boreo kovita rochta. Tacheam kovitanchem dusrem
pustok “In Tune With Life” (Jivitachea
Surar) halimch prokaxit zalam. Hea ruchichechea pustokan oglleo-unneom
109 kovita vachunk melltat. Jivitbhor sabar goxtti sotot ghoddot
astat. Tantuntli dor ek goxtt to bariksannin topasta ani tacho
koslo probhav poddta tacher niall korta. Tachea mhunn'nnea pormonnem,
bore onbhov eka-meka modhem vantponn korinastanam vanttunk zai.
Hakach lagon to koviteche madeamont apnnaita ani aple godd onbhov
vachpeam thaim pavoita. Jivit kitlem sobit, jivitantleam ghoddnukant
kitlem mohotv asa ani tem jivit sudravpacheoi suchovnneo Pri Mendes
nam kolltam vachpeam monant vompta. Tacheo kovita vachlea uprant
monant xantatai ani nitoll chintnam upzotat. Aple kovitent Pri
Mendes sompi ani soglleank somzota tosli bhas vapuddta.
|
AMCHI
MATI, AMCHICH BOLI
Bor: Miguel Braganza |
 Romi
lipint Konknni hech pillgent morpak pavlea mhonn sogllea
ganvant romott vazoun perganv ghatlolo. Punn dolle ugddun
polloilear hea ‘moddeak’ novean jiv bhorla
koso dista. Antrea-poireant, ek-ek novem-novem pustok,
veg-vegllea vixoiacher uzvaddak iet asa. Hatuntleant dista
ki hea mortolea ‘moddeak’ bhurginch nhoi punn
natraim zolmot asat. Hachech borobor pustokamcho xapai
- Povitr Pustok (Bible) - Romi lipi Konknnint punorjivitak
ailea. Hem pustok pon’nas-xembhor panamchem nhoi
punn purn don hozar ani tinxim panamchem, ani nhoi donxim-panchxim
protimchem punn satt hozar protimchem. Sorkaracho palov
nastana, xap’pun sompche adinch, hea Konknnintlea
Povitr Pustokacheo challis hozar proti khopleot.
Natram asat te maibhaxeak moronn kednach nam. |
"UPRANT
RODDON KITEAK UPKARTA?"
Hem tiatrachem pustok prokaxit kortana Anthony Vaz, Pri
Jose D'Souza, borovpi Mario Menezes and Dalgado Konknni
Akademi-cho chitnis, Michael Gracias. |
|
|
