Pulis Vaibhav Vaingankaran apnnacheach .303 arman far marun atmghat kelo. Hem ghoddlem Ponnjechea Mary Immaculate High School-ant zhoim Baravecheo porikxa choltat mhunnon pulis vevostha choltali. Orxim ho 28vis vorsamcho torno pulis Bicholechea pulis thanear zuttier also. Pulis Inspekttor Mahesh Gaonkar gomoita tea pormonnem, tannem arm vonttik tenkoilem ani far apleach horddear ghetlo. Ek boddi ghevn tannem armancho kanv voddlo. Armanchi gulli tache kuddintlean asar-pasar zavn rumanche vontticher apttoli. Hem dharunn panvol ghenvchea adim Vaibhavan don chitti borovn dorleleot ek aplea avoi-bapaik ani dusri aplea bhaojik. Tanem aple maink oxem borovn dovorlelem, “Mhaka ekdom khont bhogta. Haka konnuch zababdar nhoi. Mhaka jiopak hok nam.” Bhaojik borovn dovorle chittir boroilelem: “hanvem chintlelem ek punn bholtench ghoddlem. Kainch khorem zalemnam, mhaka kainch mevlemnam, fokot fuddarachim sopnnam mhojea lagim baki urleant”.
Abrilache 1ler, pulis Rajaram Adkonkaran undrank marpachem vik ghonttlem ani Zuari nodint uddki marunk proitn kortanam taka eka vattsurank vattailo. GMC hospitolant ek attovddo kosttovlea uprant to Abrilache 8ver somplo. Aplo jiv Rajaramank kiteak itlo zodd zalo to konnuch nokllo. Punn Abrilache 2rer tacho sakorpuddo aslo and 12ver tachem logn thorlelelem. Ho Kakra, Taliganv, ravpi pulis Agxechea thannear zuttier also. Tache boroborche pulis kanant-kan ghalun sangtat ki taka sutti divnk nasli mhunn Rajaram bejear zalolo zanviet mhunnon. Punn pulisam koddlean khobor mellta ki taka 45 disanchi rojea dileli mhunnon.
He torne pulis kamancheam avgoddaiank vho her trasank sampoddom nirxeleleat kai? Hakach lagon tannim atmghat korpak nirnoi ghetlo kai? Soglle mhunntat, atmghat korpachem dhaddos aslele he pulis aslet zalear, kamanche baptin tanchean huxarkai dakhonvk zatali. Punn zonn eklechea dukh, dogd ani trasancho hixeop zonn ekloch zanno asta. Amkam ulovpak 'tax' poddonam. Ani dor eklo zaddak vho ghorant umkollta tannemch atmghat korunk goll ghetla mhunnon konn khatren sangonk xokta?
Hi morn-kotha fuddem cholta. Babloo Gaonkar ghorant thavn bhair sorlolo porot ghora pavloch nam. Marsache 29ver tachi nirjiv kudd Salelichea eka datt ranantlea eka rukhak umolltali. Babloochi pirai fokot 43 vorsam asli. Salelichea prokornant tacher firiad choltali. Ani tachea ganvcho lok sangta, ki pulis tache kodde bogor-bogor ievn vaspus kortalet mhunnon tannem jivar ubgovn, atmghat kelo zanviet mhunnon.Kaido, vevostha ani krim vattavpak pulisanchi goroz poddta. Punn Vaibhav ani Rajararama sarkheam pulisam lagim apleach trasanchem vozon sanvronam, te somazachea faideak koxe upkartelet? Ani tisre goxttint dista Bondenvaddeailo Babloo zo somazak rakhpi pulisank bhion vho ubgovn aplo jiv zhaddar lamboita.Orvill Pereira, zaka fokot 15 vorsam aslim, tannem Mhapxenchea Pedda vattarantlea aplea ghora pattlean eke kajir umkollon, jiv dilo. Dusrea disa to SSC porikxek bospacho also. Konn-konn sangtat Orivillan porikxek bhion atmghat kelo mhunnon. Boro xikpi Orvill, ek huxar khellgoddi, porikxek bhion jiv dita zalear tachea poros komi denneamchea bhurgeamnim kitem korpachem? Punn tannem porikxek bhion jiv dilo mhunnpachem tache familik, soireank ani sezareank khorem disonam? Tor kitem zalem?Aiz-kalcheam poramcher koslem odruxtt posorlam? Marsache 1ler, eka Baina ravpi cheddvacher tachea mostea, xezarcheam cheddean, taka Sanvorddem vhoron tacher bolatkar kelo. Dabolechea vimantollar eka 18 vorsamchea cheddvak Rs.55 lakanchim ghunvlli voktam soit dhorlem. Tem Mumboichean vimanant Singapur vochpachem aslem.Ani xekim Pri Ferraochea khuneanchi pirai tori kitli? Amit Laltaprasad Shukla, 28, ani Manish Shivsagar Dubey, 20. Goemchech kiteak, bhair thavn pasun ut-ututim poram jiv divpak nam tor aplo jiv trasant ghalpak aizkal Goeam ietat. Kerlachea St Kitts Engineering kolejiche teg vidhearti, je Kolngute halimch buddon meleat, tanchi pirai kitli asli? Ansar Baker (21), PN Thomas (19) ani Bobin Mathew (22).
Aizkalchea porank pasiens nam, bilkul fursot nam. Poileach fatran ambo zomnir poddonam zalear, dusro fator ambear marche boldek te aplea kopolaruch marunk fattim sorchenant, oxem disandis vhodik dison ieta. Hacho gueanvkar konn? Haka zababdar konn? Avoi-bapui, somaz, xikxok, durdixnnem, vatavronn? Vho anink dusrem kitem?

Joel D'Souza

Igorzam-kapelanim sgourokxa sambhallpacho vell pavlo… Halimchea vorsani jem kitem amchea Goeant ghoddtta tem niall'lear kuddichi lonv ubhi zata. Pri Eusebio Ferrao Makazanacho vigar hancho dharun khunn don on-Goenkar tornatteanim adharun akhe Goenche Katolk porjek ek vhodd dukhacho bhalo toplo. Hea dharun khunna vixim sidh ki amchea goeant nhoich amche dhormache zage - igorzo-kapelam ani iadostik - surokxit nant, punn tantun ravtele amcheam dhormik vhoddillank legun hea svotontr Goeant surokxa nam. Hi ek vhodd khontichi ani chintpa sarki gozal.
Gheleam kaim 12-14 mhoinneanim Goeant ghoddloleam Kristi porjechea dhormik zageancher, zanv te magir khuris, kapelam, igorzo, adi, hea soglleam choriam ani vaitt ghoddnukam ani ollxike vixim niall kelear ek soth nodrek poddtta ani tem mhonnlear, amchea Goeant aiz Katolk porjek favo ti surokxa nam ani kheritponnim tanchea dhormachea suvatank. 44 vorsam Goenche suttke uprant hem oslem vatavronn amchea Goeant Katolk dhorma vixim poilech khepek nirmann zalam. Hem sogllem oxem ghoddunk hacho zababdar konn kai? Ho vichar aiz hanv sobhemazar vachpeank kortam. Aiz Goeant kaideachi ani kaideacheam rakhonndaranchi bhirant disandis komi zait veta. Hem fantodder mollbar udetolea suria itlem sot. Itleam zageancher Katolk dhormachea iadostincher akromonn zalem ani kaim chintop ani monisponn nasloleam tovnnaxeanim amchea dhormacher aplo rag-krodd vonklo, punn aiz meren amchea pulisank mat tancho bilkul pot'to lagunk nam, ani nam mhunn tannim aiz meren hem kortub adhartoleank aplea chopkeant faravnk nant. Hench ki ek mottem ojeap dista! Goenchea pulisanchi sodh-pus korpachi huxearkai ani takot itli oskot zalea kai? Osle her vichar hea vellar mhojea monant ghollttat. Itlench nhoi, amchea dhormachea zageancher favo ti surokxa nirmann korunk amcho sorkar khub fattim asa. Oxem disun ieta ki hem sorkarak poddun vochunkuch nam xem.
Itlem amche sovem ghoddlam astona, amchi Katolk porza khub xantt ani vhodde sosnikaiechi. Hi xivkovnn amkam lhanponnar thavnuch amchea dhormatlean mellta. Amkam vaitt kortoleank, dhumallo ditolleank bhogsunk amcho dhorm amkam xikoita. Ani heach tottvancher ani xikovnnecher amchea dhormachi bunead ghott bhanddun haddlea. Hich xanttikai ani sosnnikai amkam Kristachea nanvam hem sogllem sonsun vhorunk bholl ani kurpa dita. Ami Kristachea panvllanim ani xikovnneanim choltanv dekhun aiz meren ami hea vixim koslich uchambollai dakhovnk nam. Punn hem sogllem chol'lam tem amcho sosnnikaiecho thav kaddpak ani amkam somazant tentar korpak vo sotavn lojen ghalpak kai kitem? Osle prosnn hea vellar mhojea monant orombh ghetat? Aiz meren ami amchea dhormik vhoddlilanche xikovnnek ani uleak pall dila ani sogllem Kristachea moga khatir sonsun vhelam. Punn sosnnikaiekui xim' ani mer asta nhoi?
Fattlea eka vorsant ghoddlam tem kosak lailear atam ami hem sogllem ogich hat kovllun bosun pollevpachem kai kitem? Zorui porjen nivllun haddlolo sorkar amkam ani amchea dhormik zageank surokxa diunk xokonam dekun hacher ami atam favo ti karvai korcho vell aila.Goeant ximpoddloleam dhormik zageank, zanv magir te khuris, kapelam, igorzo vo kovent, ani toxench thuim ravtle amche dhormik fuddari, hanche surokxe vixim chintun, favo tim panvllam ubharunk goroz. Zaiteo igorzo kivam kapelam asat zhuim amche dhormik fuddari eksure ravtat ani tankam sangat divnk dusro konn nam. 17ver Marsache Makazana ganvant kitem ghoddlam tem niallun amche dhormik fuddari aiz Goeant surokxit nant hem koddu soth thavem zata.
Anik ek ghoxtt ji mhojea monak hea vellar ieta ti mhonnlear, zaiteam amchea igorzanim on-Goenkar kuzner kivam, pedde ani sankistanv kam kortat tea mud'dear. Heam kamdaram vixim ami chotur ravunk goroz. Te khuinche, tanchi purai ollokh ani mahiti ghetlea bogor tankam sirvisek dovrop sarkhem nhoi. Oslea vavrak tankam igorzanim bhorti korina zalear chodd faiddeachem, punn oslea zageancher Goeankarank dovorlear zaitem borem zatelem. Punn he babtin tankam favo to pagar divnk dor eke firgozechi zababdari. Zait godiek komi pagarak lagun amche Goenkar oslim kamam korunk fattim sortat, ani taka lagun on-Goenkarank kamank lanvche poddtat.
Ganvanim zanv xaranim, choddxeo amcheo igorzo asat thuim surokxa babtin kaim vhoddlim panvllam ubharlolim disonant. Amche dhormik fuddari thuim ravtat tankam koslich surokxa nam, vhodik korun ratchea vellar. Halinchea kallan ghoddleat teo ghoddnuko kosak lailear, surokxa vixim ami amchi zagruttai vaddoilear ani he vixim favo tim panvllam marop ekdom gorjechem.
Amcheam dhormik vhoddilank hanv hanga ulo martam: tannim hea sondhorban zata title vegin koddok panvllam ubharunk ani amchea dhormik zageank kheritponnim igorzank ani kapelank ani thuim thikan korun vavurtoleam padri bhavank favo ti surokxa nirmann korunk. Hi surokxa disachea tinui vellar (round the clock) asonk goroz. Firgoz sobhanim (Pastoral Council) hea vixim zotnnai ghevn favo tim panvllam ubharun ap-apleam igorzanim favo ti surokxa asa vo nam tem pollovn, surokxa ghoddun haddunk karvai korunk goroz.
Amcheam xaranim igorzo asat thuim atamchim adhunik iontram vaprun thuim 'hidden video cameras' vho 'burglar alarm' asun surokxa sambhallunk adhar ditat tosleo sovlotti vapurchi goroz. Hem atam soglleank gorjechem ani hea vixoi-acher xellmoddai haddchi nhoi ani besarmai korchi nhoi.
Dubhava viret veovostit surokxa babtin panvllam ubharpak khub duddvanchi goroz asa. Punn, hem sogllem tharear ghalpacheo kaim vatto asat, jea vorvim hea prokolpak duddvanchem favo tem bhanddvol toiar korunk amcheo firgoz sobho xoktat. Zoxe porim teo Natalam vellar tornnateache zomeak ani her kodden kariokrom korunk bharvarteam koddlean duddvancho sohokar ghevn hem sogllem ghoddun haddunk xoktat, toxench hem avhan jem amche mhukar ubhem zalam tem vevharan ghalunk zata. Duddvanchi oddchon pois korunk ieta. Punn fuddakar gheunk goroz. Ani to mhonnlear tabortob!
Hanv somzotam amche dhormik vhoddil hea vixim aplem lokx divn favo ti toiari korunk firgoz sobhek, fabrikak ani her vangddeank ekhtthaim haddun hacher gombhirponnim cheorcha korun, fuddarak amchea padrinche ani igorzam-kapelanche surokxa vixim faiddeachim panvllam ubhartole mhunn.

Daniel F de Souza
danielf@sancharnet.in